अनलाइन डबली
काठमाडौं । सरकार र आन्दोलनरत शिक्षकहरुबीच गृहमन्त्रालयमा भएको वार्ता निष्कर्षविहीन बनेको छ । विहीबार साँझ गृहमन्त्रालयमा भएको वार्तामा शिक्षकहरुले संविधान विपरितका आफ्ना एजेण्डाबाट पछि हट्न तयार नभएपछि वार्ता निष्कर्षविहीन बनेको हो ।
वार्तामा सरकारका तर्फबाट उपप्रधान तथा गृहमन्त्री नारायणकाजी श्रेष्ठसँगै शिक्षा, विज्ञान तथा प्रविधिमन्त्री अशोक राई, अर्थमन्त्री डा. प्रकाशशरण महत र कानुन, न्याय तथा संसदीय मामिलामन्त्री धनराज गुरुङ र सम्बन्धित मन्त्रालयका सचिवहरु सहभागी छन् । त्यस्तै, शिक्षकहरुको तर्फबाट शिक्षक महासंघका पदाधिकारीहरु वार्तामा सहभागी रहेका छन् ।
वार्तापछि संचारकर्मीसँग कानूमन्त्री धनराज गुरुङले भोलि टुंग्याइने जानकारी दिए ।
त्यसैगरी नेपाल राष्ट्रिय राष्ट्रिय शिक्षक संघका अध्यक्ष विष्णुप्रसाद भण्डारीले अनिश्चितकालीन आन्दोलन जारी रहने बताए । उनले सहमति नभइ आन्दोलन नछोड्ने बताउँदै वार्ता कमिटी गठन गरेर मात्रै सहमति हुने बताए ।
वार्ता शुक्रबार विहान ९ बजे हुनेछ ।
सरकारले विद्यालय शिक्षा विधेयकमा शिक्षकहरुले नीजि विद्यालयमा लगानी गर्न र पढाउन नपाउने, चन्दा तथा दान लिन नपाउने, शिक्षकको सरुवा, बढुवा र कारबाहीको व्यवस्था स्थानीय तहलाई दिने, शिक्षकलाई ट्रेड युनियन अधिकार नदिने दिनुपर्नेजस्ता प्रावधान राखेपछि शिक्षकहरु आन्दोलनमा उत्रेका हुन् ।
शिक्षकहरुले राखेका सबै माग पूरा गर्न सरकारले संविधान नै संशोधन गर्नुपर्ने हुने देखिएको छ । शिक्षकहरुले उठाएका सबै माग पूरा गर्न सरकार तयार नभएपनि ट्रेड युनियनलगायतका माग भने पूरा गर्न सक्ने अधिकारीहरु बताउँछन् ।
