अनलाइन डबली
काठमाडौं । आज संसदीय समितिले पूर्णता पाउने भएका छन् । प्रतिनिधिसभा अन्तर्गत गठित १० वटा विषयगत समितिले सभापतिको लागि आइतबार मनोनयन दर्ता भएको थियो ।
सत्ता र प्रतिपक्षबीच समितिको भागबण्डा गरिएको छ भने प्रतिपक्षमा नेकपा एमालेलाई साथ दिँदै आएको रास्वपाले भने हात धुनु परेको छ । प्रतिपक्षमै रहेको राप्रपाले एक समितिको नेतृत्व पाउँदा संसदको चौथो ठूलो दल रास्वपा भने निल भएको छ ।
दलहरूबीच भएको सहमतिअनुसार कांग्रेसले तीन, एमालेले दुई, माओवादी, राप्रपा, नेकपा एस, जसपा र जनमत पार्टीबाट एकएक समिति सभापतिमा उम्मेदवारी परेको छ ।
दश समितिमध्ये रास्वपाले उद्योग तथा वाणिज्य र श्रम तथा उपभोक्ता हित समितिको सभापतिका लागि उम्मेदवारी दिएको छ ।
कांग्रेसका सांसद आरजु राणा कृषि, सहकारी तथा प्राकृतिक स्रोत समिति र रामहरि खतिवडाले सुशासन समितिको र सन्तोष चालिसेले अर्थ समितिको सभापतिमा उम्मेदवारी दर्ता गरका छन्।
यस्तै एमालेका सांसद ऋषिकेश पोखरेलले सार्वजनिक लेखा समितिको सभापति र किरणकुमार साहले महिला तथा सामाजिक मामिला समितिमा उम्मेदवारी दिएका छन्।
सत्तारूढ दल माओवादी केन्द्रका सांसद विमला सुवेदीले कानुन न्याय तथा मानवअधिकार र जसपाका सांसद राजकिशोर यादवले अन्तर्राष्ट्रिय सम्बन्ध तथा पर्यटन समितिमा उम्मेदवारी दर्ता गरेका छन्।
यसैगरी एकीकृत समाजवादीका भानुभक्त जोशीले शिक्षा स्वास्थ्य तथा सूचना प्रविधि, राप्रपाका दिपक सिंहले पूर्वाधार विकास र जनमत पार्टीका अब्दुल खानले उद्योग तथा वाणिज्य र श्रम तथा उपभोक्ता हित समितिमा आफ्नो उम्मेदवारी दर्ता गरेका छन्।
संसद सचिवालयका अनुसार एकल उम्मेदवारी प्रस्ताव आएका समितिमा स्वतः सभापति घोषणा हुने र रास्वापले उम्मेदवारी दिएको समितिमा निर्वाचन हुने भएको छ ।
