अनलाइन डबली
काठमाडौँ । राष्ट्रपति रामचन्द्र पौडेलले संसदीय संसदका नेतृत्वलाई बोलाएर लामो समय संसद् चल्न नसक्दा जनतामा नैराश्यता बढ्ने बताएका छन् ।
प्रतिनिधिसभाका सभामुख देवराज घिमिरे र राष्ट्रियसभा अध्यक्ष गणेश तिमिल्सिनालाई शुक्रबार शीतलनिवासमा बोलाएर संसद खुलाउनेबारे छलफलको क्रममा सो कुरा बताएका हुन् । राष्ट्रपति दुबै संसद खुलाउन समेत आग्रह गरेका छन् ।
राष्ट्रपतिका प्रेस सल्लाहकार किरण पोखरेलका अनुसार छलफलका क्रममा संसद्को गतिरोधप्रति राष्ट्रपतिले चासो राख्दै लामो समय संसद् चल्न नसक्दा जनतामा नैराश्यता बढ्ने र कानून निर्माणमासमेत बाधा पुग्ने भन्दै गतिरोध हटाउन आग्रह गरेका थिए ।
राष्ट्रपति पौडेलले सत्ता र प्रतिपक्षलगायत संसदमा रहेका सबै दलहरूलाई विश्वासमा लिएर संसद खुलाउनका लागि आवश्यक पहल गर्न पनि सभामुख घिमिरे र राष्ट्रियसभा अध्यक्ष तिमिल्सेनाको ध्यानाकर्षण गराएका छन् ।
