अनलाइन डबली
काठमाडौं । नेपाली काँग्रेसका केन्द्रीय सदस्य गुरुराज घिमिरेले स्वास्थ्य क्षेत्रमा पाँच लाख पर्ने सामाग्री सेटिङ गरेर १८ लाखमा खरिद गर्ने गरेको बताए । संवाद डबलीको स्वास्थ्य संवाद कार्यक्रममा बोल्दै घिमिरेले भने, “पाँच लाख पर्ने सामाग्रीमा १८ लाखमा सेटिङ गरेर खरिद गरिन्छ । कमिसनको चक्करमा यस्तो भइरहँदा सरकारको ध्यान नपुग्न जनता मार परेका छन् ।”
अधिकांश नीतिगत भ्रष्टाचारको कारण आम–जनताको स्वास्थ्य अवस्था दिनदिनै खस्किँदै गएको र नागरिकले अकालमै ज्यान गुमाउनु परेको धाराणा राखे ।
कार्यक्रममा बोल्दै घिमिरेले स्वास्थ्य क्षेत्रको वेथितिका कारण नागरिकले स्वास्थ्य सेवा नपाएको बताए । उनले त्यसको अन्त्य गर्न सरकारले ध्यान दिनुपर्ने बताउँदै भ्रष्टाचारको जालो तोडेमात्रै संविधानमा उल्लेख भएअनुसार नागरिकले स्वास्थ्य सेवा पाउने बताए ।
स्वास्थ्य क्षेत्र नागरिकको पहुँचमा ल्याउन निर्मम हुन स्वास्थ्य मन्त्री मोहनबहादुर बस्नेतलाई सुझाव समेत दिए । जनताको पक्षमा केही गर्न मन्त्री बस्नेतको लागि सुनौलो अबसर भएको भन्दै ओम्नी काण्डबाट स्वास्थ्य क्षेत्रका भ्रष्टाचारको फाइल खोल्नुपर्ने घिमिरेले धारणा राखे ।
नेता घिमिरेले बोलपत्र आह्वान गर्दाखेरी नै व्यापकमात्रामा भ्रष्टाचारको सेटिङ हुने हुँदा त्यसलाई राज्य संरक्षित नीतिगत भ्रष्टाचारको संज्ञा दिँदै भने,“यस्तो कहाली लाग्दो अवस्थालाई चिर्न यो सरकारले निर्मम भएर अगाडि बढ्नुपर्छ ।”
