अनलाइन डबली
काठमाडौँ । प्रधानमन्त्री प्रचण्ड पत्नी सीता दाहालको भव्य समारोहबीच श्रद्धाञ्जलीसभा आयोजना गरिएको छ । प्रधानमन्त्री निवास बालुवटारमा सीताको निधन भएको सातौँ दिन पारेर श्रद्धाञ्जलीसभा समारोह आयोजना गरिएको हो ।
कार्यक्रममा प्रधानमन्त्री प्रचण्डले सीता दाहालको निकै शान्त मृत्यु रोजेको बताएका थिए । अन्तिम अवस्थामा अस्पतालको आइसीयु वा भेन्टिलेटरमा उनको पीडादायी मृत्युवरण देख्नुपर्छ कि भन्ने चिन्ता लागेको बताउँदै प्रचण्डले बाच्दासम्म सीताले अरूलाई पीडा नदिएको बताए ।
सीताप्रति श्रद्धाञ्जली दिने सबैलाई धन्यवाद व्यक्त गर्दै प्रधानमन्त्री प्रचण्डले अस्पतालदेखि पार्टी कार्यालयसम्म र आर्यघाटदेखि बालुवाटारसम्म उनले पाएको सम्मान र श्रद्धाञ्जली उनको त्याग तपस्या र बलिदानप्रति जनताको न्याय र सम्मान भएको बताए ।
श्रद्धाञ्जलीसभामा उपराष्ट्रपति, पूर्व उपराष्ट्रपति ,सभामुख, राष्ट्रिय सभा अध्यक्ष,पूर्व प्रधानमन्त्रीहरू, मन्त्रीहरू, कूटनीतिज्ञहरूका साथै समाजका विभिन्न क्षेत्रका व्यक्तिहरू सहभागी भएका थिए ।
श्रद्धाञ्जलीसभामा सीताको योगदान झल्किेन भिडियो सामाग्री समेत प्रदर्शन गरिएको थियो ।
सीता दाहालको ६९ वर्षको उमेरमा गत असार २७ गते निधन भएको थियो ।
