अनलाइन डबली
काठमाडौँ । प्रधानमन्त्री प्रचण्ड गिरिजाप्रसाद कोइरालाले आफूलाई देश समाल्नुस् भनेको बताएका छन् । अस्पतामा मृत्युसँग जुधिरहेको बेला कोइरालाले आफूलाई एक्लै बोलाएर सो कुरा भनेको स्मरण भइरहेको प्रचण्डले बताए ।
नेपाली कांग्रेसका सभापति स्व. कोइरालाको एक सयौँ जन्मजयन्तीको अवसरमा आयोजित कार्यक्रमलाई सम्बोधनको क्रममा सो कुराको स्मरण गर्दै प्रधानमन्त्री प्रचण्डले गणतन्त्रको पहिलो राष्ट्रपतिमा प्रस्ताव नगरेकोमा आफूलाई पश्चात्ताप रहेको बताए ।
“अस्पतालमा जतिवेला उहाँ मृत्युसँग जुधिराख्नुभएको थियो मलाई एक्लै बोलाएर सम्हाल्नुस् देश भनेका कुराहरूले मलाई गिरिजाप्रसाद कोइरालाप्रति अगाध आस्था र विश्वास भइराख्यो । शान्तिको रक्षा गर्ने कुरा, संविधानको रक्षा गर्ने कुरा र समग्र प्रक्रियाको रक्षा गर्ने कुरामा धेरै ठूलो दायित्व छ भन्ने कुराको प्रेरणाको स्रोत गिरिप्रसाद कोइराला हो” प्रचण्डले भने ।
कोइरालालाई राष्ट्रपतिको प्रस्ताव नगरेकोले आफूलाई पहिलेजस्तो विश्वास र भरोसा गर्नुहन्न कि भनेर लागेको तर त्यस्तो कहिलै नगरेको बताए । प्रचण्डले आफूले प्रधानमन्त्रीबाट राजिनामा दिने मनस्थिति बनाएपछि कोइरालाले पटकपटक नगर्नुस् भनेको बताए ।
“मैले गणतन्त्र नेपालको पहिलो राष्ट्रपतिको प्रस्ताव नगरिराख्दा सायद उहाँले मलाई पहिलाको जस्तो भरोसा र विश्वास गर्नुहुन्न कि जस्तो लाग्थ्यो तर उहाँले त्यस्तो गर्नुभएन । मैले प्रधानमन्त्रीबाट राजीनामा गर्ने मनस्थिति बनाएपछि पटक पटक राजीनामा नदिन भन्नुहुन्थ्यो” प्रचण्डले भने । प्रचण्डले कोइरालामा राजनीतिक सुझबुझ र दुर्दृष्टिकै कारण अहिलेको परिवर्तन सम्भव भएको पनि बताए ।
कोइरालालाई पहिलो पटक भेटदेखि अन्तिम भेट हुँदासम्म कुनै द्विधा, अविश्वास, आशङ्का या आशङ्का नदेखेको भन्दै बरु आफूले गल्ती गरेको तर कोइरालाले गल्ती नगरेको बताए ।
