अनलाइन डबली
काठमाडौं । नेकपा माओवादी केन्द्रको पहल र नेतृत्वमा समाजवादी मोर्चा घोषणा गरिँदैछ । सोमबार (आज) राष्ट्रिय सभागृहमा मोर्चाको घोषणा गरिने लागिको हो ।
मोर्चामा नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) र विप्लव नेतृत्वको नेपाल कम्युनिष्ट पार्टी सहभागी छन् ।
आइतवार बसेको शिर्ष नेताहरुको बैठकले मोर्चालाई अन्तिम रुप दिएको थियो । मोर्चाको साझा मुद्दा, लक्ष्य, उद्देश्य र प्राथमिकतासहित प्रतिबद्धतासहित १५ बुँदे प्रतिबद्धतालाई पनि नेताहरुले टुंगो लगाएका छन् ।
१५ बुँदे प्रतिबद्धतामा संघीय लोकतान्त्रिक गणतन्त्रको रक्षा र सुदृढीकरण गर्दै नेपाली समाजवादको विशेषताहरू पहिचान गरी समाजवादको नेपाली बाटो तय गर्ने, नेपालमा सदियौंदेखि कायम रहिआएको वर्गीय, जातीय, भाषिक, क्षेत्रीय, लैंगिक र जात व्यवस्थाजन्य शोषण, उत्पीडन, असमानता र विभेदहरू अन्त्य गर्ने रहेको छ । त्यसका लागि निरन्तर जनपहल र जनदबाब सिर्जना गर्ने, मानव विकास सूचकांकमा पछाडि परेका मधेश, कर्णाली र सेती–महाकाली लगायत पिछडिएको क्षेत्र र जनताको विकास र अवसरलाई विशेष प्राथमिकतामा राख्ने रहेको छ ।
त्यसैगरी राजनीतिक, आर्थिक, सामाजिक र सांस्कृतिक रूपले बहिष्करणमा परेका वा पारिएका मधेशी, आदिवासी जनजाति, खस, दलित, मुस्लिम, थारू, पिछडा वर्ग, अल्पसंख्यक समुदाय, विपन्नवर्ग लगायतका सीमान्तकृत समुदायहरूको पहिचानको मान्यता, समावेशीकरण र सामाजिक न्यायको प्रत्याभूति गराउने कार्य अगाडि बढाउने नीति मोर्चाको रहेको छ ।
मोर्चामा सहभागी दलबीच एउटा संयोजन समिति बनाउने र त्यसको पालैपालो अध्यक्षता गर्ने समेत नेताहरु सहमत भएका छन् ।
मोर्चाको पहिलो नेतृत्व प्रधानमन्त्री तथा नेकपा माओवादी केन्द्रका अध्यक्ष प्रचण्डले गर्ने सहमति भएको नेताहरुले बताएका छन् ।
