अनलाइन डबली
काठमाडौँ । प्रधानमन्त्री प्रचण्डले आमरण अनसन बसेका नुवाकोटका किसान श्रीराम घिमिरेका माग पूरा गर्न निर्देशन दिनुभएको छ । अनसन बसेको पाँचौं दिन प्रधानमन्त्रीले घिमिरेले उठाएका जायज माग पूरा गर्न निर्देशन दिनुभएको हो ।
प्रधानमन्त्रीले श्रीराम अनसन बसेको जानकारी पाएपछि मुख्यसचिव शंकरदास बैरागीमार्फत् माग सम्बोधन गर्न कृषि तथा पशुपक्षी मन्त्रालयलाई निर्देशन दिएको प्रधानमन्त्रको स्वकीय सचिवालयले जानकारी दिएको छ ।
प्रधानमन्त्री प्रचण्डले शुक्रवार साँझ मुख्य सचिवसहित कृषि तथा पशुपक्षी विकास मन्त्रालयका सचिव गोविन्दप्रसाद शर्माबाट अनसनकारीको स्वास्थ्य अवस्था एवम् माग सम्बोधनमा भइरहेको प्रगतिबारे समेत जानकारी लिनुभएको थियो ।
सो क्रममा कृषि तथा पशुपक्षी विकास मन्त्रालयका सचिव गोविन्दप्रसाद शर्माले मन्त्रालयले अनसन बसेको जानकारी आएको आधा घण्टामै अनसन स्थलमा पुगेर रेस्पोन्स गरेको, मन्त्रालयबाटै डा नवीन घिमिरे, डा माधवप्रसाद अर्याल र शिवसुन्दर घिमिरेसहित वार्ता टोली बनाई निरन्तर वार्ता र छलफल गरिरहेको तथा मन्त्रालयको तहबाट गर्न सक्ने सबै माग पूरा गर्न सकिने प्रस्ताव अनसनरत किसान सामु पठाइए पनि हालसम्म सहमतिमा नआएको जानकारी गराउनुभएको थियो ।
प्रधानमन्त्री प्रचण्डले सरकार जनसरोकारका मुद्दामा अत्यन्तै संवेदनशील रहेको र जनजीविकाका सवाललाई उठाएर कोही कसैले पनि आन्दोलन गर्नु नपर्ने अवस्थाका लागि क्रियाशील रहेकाले किसान घिमिरेले उठाउनुभएका विषयलाई समाधान गर्न अधिकतम प्रयत्न गर्न तथा निजको स्वास्थ्यमा पनि ध्यान दिन निर्देशन दिनुभएको छ ।
