अनलाइन डबली
काठमाडौं । प्रधानमन्त्री प्रचण्डले नेपाल र चीनबीचको सम्बन्ध जनस्तरसम्म रहेको बताउँदै लामो इतिहास रहेको बताएका छन् । प्रधानमन्त्रीले दुई देशबीचको आर्थिक, सांस्कृतिक एवं जनस्तरको सम्बन्ध रहेको बताए ।
प्रधानमन्त्रीले चीन नजिकको छिमेकी, असल मित्र र भरपर्दो साझेदारका रूपमा नेपालले चीनसँग थप सम्बन्ध विस्तार गर्न चाहेको बताए । उनले चीनले चिकित्सा विज्ञान र प्रविधिसहितको सामाजिक आर्थिक विकासमा गरेको ठूलो फड्कोबाट हामीले पनि फाइदा लिनुपर्ने बताए ।
चीन सरकारको सहयोगमा बनेको निजामति अस्पतालको विस्तारित र स्तरोउन्नती भवन हस्तान्तरण कार्यक्रममा बोल्दै प्रधानमन्त्रीले अस्पताल नेपाल र चीनबीचको घनिष्ट सम्बन्धको प्रतिक भएको बताए।
“नजिकको छिमेकी र मित्रराष्ट्र चीनको यो उदारता र वास्तविक ऐक्यबद्धतालाई हामी सधैँ स्मरण गरिरहन्छौँ” प्रधानमन्त्रीले भने ।
“हामीलाई प्राप्त सहयोग विकास पूर्वाधार निर्माण गर्न सम्पर्क सञ्जालको विस्तार तथा नेपाली नागरिकलाई सहज स्वास्थ्य सुविधा प्रदान गर्न एवं मानव संसाधनको विकास र जीविकोपार्जनलाई थप सहज बनाउन धेरै सहयोगी रहँदै आएको छ” प्रधानमन्त्रीले भने । उनले पछिल्ला दिनमा दुई देशबीचको सम्बन्ध थप विस्तारितै हुँदै गएकामा खुसी व्यक्त गरे ।
भरतपुरमा क्यान्सर अस्पताल निर्माणमा पनि चीनले सहयोग उपलब्ध गराएकामा चीन सरकारलाई धन्यवाद दिँदै प्रधानमन्त्रीले यस क्षेत्रमा चीन सरकारबाट निरन्तर प्राप्त भएको साथप्रति आभार प्रकट गरे।
चीनका विभिन्न विश्वविद्यालयमा नेपालमा चिकित्सक र स्वास्थ्यकर्मीले अध्ययन गरिरहेको तथ्य पेश गर्दै प्रधानमन्त्रीले त्यहाँबाट फर्किएकाले यहाँ उत्कृष्ट सेवा गरिरहेकोमा प्रसन्नता व्यक्त गरे ।
