अनलाइन डबली
काठमाडौँ । नेपाल कम्युनिस्ट पार्टी (क्रान्तिकारी माओवादी) र नेकपा बहुमत पार्टीबीचको एकता घोषणा हुँदैछ । दुबै पार्टीको एकताको लागि बनेको कार्यदलले गृहकार्यले विचार र कार्यक्रममा सहमति जुटाएपछि एकताको घोषणा हुन लागेको हो ।
शुक्रबार पत्रकार सम्मेनलको आयोजना गरेर पार्टी एकताबारे जानकारी दिइने भएको छ ।
एकताको अन्तिम घोषणा आगामी बैशाख १८ गते मजदूर दिवसको दिन गर्ने नेताहरुले बताएका छन् । भोलिबाट कार्यदलले औपचारिक रुपमा संगठनलगायतका विषयलाई टुंगोमा पुर्याउन छलफल थाल्नेछ ।
पार्टीको नाममा माओवादी शब्द नहटाउने र अध्यक्षमण्डलको अध्यक्ष किरण हुने नेताहरुले बताएका छन् ।
यसअघि गत साउन २० गते क्रान्तिकारी माओवादीका महासचिव मोहन वैद्य ‘किरण’ र नेकपा बहुमतका संयोजक धर्मेन्द्र बास्तोला ‘कन्चन’ सहितको बैठकले एकता प्रक्रियालाई अघि बढाउन संयोजन समिति गठन गरिएको थियो । उक्त समितिले विभिन्न चरणमा छलफल तथा संवाद गर्दै एकताको मोडालिटी समेत तय गरेको थियो ।
एकता प्रक्रियाको लागि नेकपा विद्रोही मसाल सहभागी हुने भनेपनि आन्तरिक तयारी अपुग भएको भन्दै भोलिको एकतामा सहभागी नहुने भएको नेताहरुले बताएका छन् ।
