अनलाइन डबली
काठमाडौँ । प्रधानमन्त्री प्रचण्डले आज मन्त्रिपरिषद् विस्तार गर्ने भएका छन् । विहीबार साँझ गठबन्धनको बैठकमा दलहरु आआफ्नो पार्टीबाट पठाउने मन्त्रीको नामको टुंगो लगाएका जानकारी प्रधानमन्त्रीलाई दिएपछि आज मन्त्रिमण्डल विस्तारको तयारी भएको हो ।
मन्त्रालयको टुंगो लागेपनि दलहरुको पार्टीमा आकांक्षी धेरै भएकोले छलफलको लागि समय मागेका थिए । प्रधानमन्त्रीले मिलेका मन्त्रालयमा मन्त्रीको नियुक्त गर्दै जाउँ भन्दा दलहरुले त्यसले विवाद झन बढ्ने बताएका थिए ।।
नवनियुक्त मन्त्रीहरुको शपथ आजै गराउने तयारी पनि भइरहेको छ । दिउँसो ३ बजेसम्म शपथ गराउने जानकारी आएको राष्ट्रपति कार्यालय स्रोतले बताएकाे छ ।
मन्त्रिमण्डल विस्तार अघि पुनः एक पटक गठबन्धनको बैठक बस्ने बताइएको छ ।
गठबन्धनमा कांग्रेसले ८ माओवादीले ५, एकीकृत समाजवादी, जसपा २–२ र लोसपा, नागरिक उन्मुक्ति, जनमतले १–१ मन्त्रालय पाउने यसअघि नै सहमति भइसकेको छ ।
