दाङ । लुम्बिनी प्रदेशमा नेकपा एमाले नेतृत्वका सरकार संकटमा परेको छ । नेकपा माओवादी केन्द्रले लुम्बिनी प्रदेशका मुख्यमन्त्री लिला गिरीलाई दिएको समर्थन फिर्ता लिने तयारी गरेसँगै एमाले नेतृत्वको सरकार संटकमा परेको हो ।
आज बस्ने संसदीय दलको बैठकले गिरीलाई दिएको समर्थन फिर्ता लिने निर्णय गर्ने बताइएको छ । माओवादी केन्द्रको लुम्बिनी प्रदेश अध्यक्ष सुदर्शन बरालले भने संसदीय दलको बैठकबाट सरकारको समर्थन फिर्ता लिने निर्णय हुने बताए ।
गत पुस २७ गते ७ दलका ५६ र २ स्वतन्त्र गरी जम्मा ५८ सांसदको समर्थनमा नेकपा एमालेका लिला गिरी मुख्यमन्त्रीमा नियुक्त भएका थिए । गिरीले माघ ५ गते विश्वासको मत पाएका थिए ।
एमालेले केन्द्रसँगै लुम्बिनी प्रदेशमा पनि सरकारबाट हात धुनुपर्ने अवस्था आएको छ । एमालेले नेतृत्व गरेको कोशी प्रदेश र गण्डकीमा पनि यही अवस्था सिर्जना हुने निश्चित जस्तै छ ।