अनलाइन डबली
काठमाडौँ । सरकारले फलफूल, तरकारी र खाद्यजन्य वस्तुको विषादी परीक्षण सम्बन्धी प्रस्ताव यथाशीघ्र मन्त्रिपरिषदमा पेश गर्ने निर्णय गरेको छ । विहीबार बसेको मन्त्रिपरिषद् बैठकमा प्रस्तावलाई मन्त्रिपरिषद्को विषयगत समितिमा छलफलका लागि पठाई यथाशीघ्र पेश गर्ने निर्णय गरेको हो ।
केही संचारमाध्यम र राजन्ीतिक दलका नेताहरुले भारतबाट विषादी परिक्षणबिना नै तरकारी आयात गर्न दिन विषादी परीक्षणसम्बन्धी प्रस्ताव मन्त्रिपरिषद्बाट फिर्ता लगिएको बताएका थिए । तर, सरकारले अस्वीकार गरेको थियो ।
यसअघि प्रधानमन्त्री कार्यालयको टोली काठमाडौंको कालिमाटीमा सञ्चालित विषादी विश्लेषण प्रयोगशालाको निरीक्षण गरेको थियो ।
फागुन १८ गते प्रधानमन्त्री तथा मन्त्रिपरिषद्को कार्यालयको समन्वय र कृषि तथा पशुपन्छी विकास मन्त्रालयको नेतृत्वमा गएको टोलीले फलफूल तथा तरकारीमा विषादी परीक्षणका लागि सञ्चालित विषादी अवशेष द्रूत विश्लेषण प्रयोगशालाको अनुगमन गरेको थियो ।
