काठमाडौं । आठदलीय गठबन्धनले आज बागमती प्रदेशका सांसदहरुलाई राष्ट्रपति चुनावबारे अभिमुखीकरण कार्यक्रम गर्दैछ । राष्ट्रपति चुनावमा गठबन्धनका उम्मेदवारलाई विजयी गराउन अभिमुखीकरण कार्यक्रमको आयोजना गरिएको हो ।

विहीबार राष्ट्रियसभा र प्रतिनिधिसभाका सांसदहरुलाई अभिमुखीकरण गरिएको थियो । यसअघि गठबन्धनको बैठकले संघ र प्रदेशका सांसदहरुलाई अभिमुखीकरण कार्यक्रम गर्ने निर्णय गरेको थियो ।

सोही निर्णय अनुसार आज दिउँसो १ बजे नयाँ वानेश्वरको आनन्द इभेन्टमा अभिमुखीकरण कार्यक्रम गर्न लागिएको हो ।

फागुन २५ गते हुने राष्ट्रपतिको निर्वाचनमा गठबन्धनले रामचन्द्र पौडेललाई राष्ट्रपतिको उम्मेदवार बनाएको छ । नेपाली कांग्रेसका उपसभापति पूर्णबहादुर खड्काको संयोजकत्वमा अन्य राजनीतिक दलका प्रतिनिधिहरु रहनेगरी ‘राष्ट्रपति निर्वाचन अभियान परिचालन र संयोजन संयन्त्र’ गठन गरिएको छ ।