अनलाइन डबली
काठमाडौं । अब एक नम्बर प्रदेशको नाम ‘कोशी प्रदेश’ हुने भएको छ । बुधबार बसेको प्रदेशसभामा नाम ‘कोशी प्रदेश’ राख्ने प्रस्ताव दुई तिहाई मतभन्दा बढी मतले पारित गरेको थियो ।
लामो समयदेखि नामाकरण हुन नसकेको प्रदेशको नाम प्रदेशसभाको दोस्रो कार्यकालको पहिलो अधिवेशनले टुंगो लागेको छ । प्रदेशसभाको सबैभन्दा ठूलो दल नेकपा एमालेसहित नेपाली काँग्रेस र नेकपा माओवादी केन्द्र एक ठाउँमा उभिएपछि दुई तिहाई जुटेको हो ।
कुर्सी धरमराएका मुख्यमन्त्री हिक्मत कार्कीको लागि नामाकरण ठूलो सफलता हो । प्रदेशको नाम कोशी प्रदेश हुनुपर्ने नेकपा एमालेले संसद सचिवालयमा बुधबार बिहान दर्ता गरेको थियो ।
प्रदेशसभाका ९२ सांसदमध्ये ८२ जनाले पक्षमा र ४ जनाले विपक्षमा मतदान गरेका थिए । त्यस्तै, ६ जना सांसद अनुपसुथित रहेका थिए ।
नेकपा (एकीकृत समाजवादी) र जनता समाजवादी पार्टीले भने पहिचान र सामथ्र्यको आधारमा ‘किरात लिम्बुवान सगरमाथा’ नाम हुनुपर्ने प्रस्ताव दर्ता गरेको थियो । उक्त प्रस्ताव नै प्रदेशसभाले पारित नगरेपछि मत विभाजनको प्रक्रियामा गएन । प्रदेशसभामा एकीकृत समाजवादीका ४ र जसपाका १ जना सांसद छन् ।
प्रदेशको नामाकरण भएको खुशीयालमीमा आज सरकारले सार्वजनिक बिदाको घोषणा भएको छ ।
प्रदेश मन्त्रिपरिषद्को निर्णयअनुसार आन्तरिक मामिला तथा कानुन मन्त्रालयले विज्ञप्ति निकालेर आज प्रदेशभर सार्वजनिक बिदा दिने घोषणा गरेको छ । प्रदेश सरकारले नामकरण भएको उपलक्ष्यमा प्देशका सम्पूर्ण बासिन्दालाई बधाई ज्ञापन समेत गरेको छ ।
