अनलाइन डबली
काठमाडौं । आठ दलीय गठबन्धनको बैठक सकिएको छ । आइतबार साँझ प्रधानमन्त्री निवास बालुवाटारमा बसेको बैठकले यही १८ गते संघीय र १९ गते प्रदेश सांसदहरुलाई राष्ट्रपति चुनावबारे अभिमुखीकरण दिने निर्णय गरेको छ ।
बैठकले २३ गतेभित्र सबै सांसदहरुलाई काठमाडौं आइसक्न निर्देशन समेत दिने निर्णय गरेको छ । त्यसको लागि राजनीतिक पार्टीहरुले आआफ्नो पार्टीबाट निर्देशन दिन बताइएको छ । २४ गते सबै सांसदलाई काठमाडौँमा ब्रिफिङ गरिने र रामचन्द्र पौडेललाई मत दिन निर्देशन दिने निर्णय भएको जसापका नेता राजेन्द्र श्रेष्ठले जानकारी दिए ।
सांसदहरूलाई नयाँ समीकरणको आवश्यकता, संविधानको रक्षा, प्राप्त उपलब्धि बचाउन नयाँ गठबन्धन आवश्यक भएकोबारे स्पष्ट पार्ने र जनतामा छरिएको अस्थिरताबारेको भ्रम हटाउन प्रयास गर्ने गठबन्धनले पहल गर्ने र बैठकले सबै दललाई राष्ट्रपतिको निर्वाचनमा नेपाली कांग्रेसका उम्मेदवार रामचन्द्र पौडेललाई सहयोग गर्न आह्वान पनि गरेको छ ।
त्यसैगरी बैठकले आठ दलका एक एक जना प्रतिनिधि रहने गरी एक कार्यदल बनाउने र त्यसले पार्टीभित्र र अन्तर पार्टी छलफल गर्ने निर्णय पनि गरेको छ ।
