अनलाइन डबली
काठमाडौँ । नेकपा माओवादी केन्द्र मधेश प्रदेश सरकारमा सहभागी भएको छ । समर्थन गरेपनि अहिलेसम्म माओवादी केन्द्र सरकारमा सहभागी भएको थिएन ।
सोमबार मुख्यमन्त्री सरोजकुमार यादवले माओवादी केन्द्रबाट उद्योग वन तथा पर्यटन मन्त्रीमा सुनिता यादव र राज्यमन्त्रीमा रहबर अंसारीलाई नियुक्त गरेका छन् । नवनियुक्त मन्त्रीले शपथ लिने कार्यक्रम छ । सोमबार नै नियुक्तिको पत्र प्रदेश प्रमुख कार्यालयमा पठाइएको थियो ।
मधेस प्रदेश सरकारले पूर्णता पाएको छ । मुख्यमन्त्री यादवले पुस २९ गते तीनजना मन्त्री र माघ २० गते ६ मन्त्री र ३ राज्यमन्त्री नियुक्त गरेका थिए ।
अब मधेश सरकारमा मुख्यमन्त्री, १० मन्त्री र चार राज्यमन्त्रीसहित मन्त्रीमण्डलको संख्या १५ सदस्य पुगेको छ ।
सरकारको नेतृत्व गरेको जसपाले अर्थ, सामाजिक विकास र खाने पानी तथा ऊर्जा विकास मन्त्रालयसहित तीन मन्त्रालय, नेकपा एमालेले भौतिक पूर्वाधार विकास मन्त्रालय, गृह तथा सञ्चार मन्त्रालय, कानून न्याय तथा प्रदेश मामिला र महिला तथा बालबालिका, युवा तथा खेलकुदमन्त्रालयसहित चार मन्त्राय र जनमतले भूमि व्यवस्था कृषि तथा सहकारी मन्त्रालय र शिक्षा विज्ञान प्रविधि तथा वाणिज्य मन्त्रयसहित दुई मन्त्रालय पाएको थियो ।
माओवादी सहभागी नभएका कारण सरकारले पूर्णता पाउन सकेको थिएन ।
