अनलाइन डबली
काठमाडौं । रवि लामिछानेको गृहमन्त्रालयको लागि दिएको धम्की नेपाली समाजमा चर्चित श्रीमान श्रीमतिको धम्की सम्बन्धी कथाजस्तै भएको छ ।
कथामा श्रीमानले श्रीमतिलाई धम्की दिँदै नुहाउन तातोपानी तताउन भन्थे ‘तातोपानी लगाउ नत्र…’ । श्रीमति पनि डराउँदै सबै काम छोडेर तातोपानी लगाउथिन् । एकदिन श्रीमति काममा व्यस्त थिइन् । फेरि श्रीमानले धम्की दिँदै तातोपानी लगाउन भने, अत्ति भएपछि श्रीमतिले तताउँदैन के गर्छस् गर भनिनन् । त्यसपछि उनको धम्की एकैपटक माटोमा मिल्यो र भने, ‘अब चिसैपानीले नुहाउछु ।’
यो कथाजस्तै भएको छ रविको धम्की पनि । प्रधानमन्त्री प्रचण्डलाई आफू, एमाले र शक्तिकेन्द्रबाट दवाव दिन लगाउँदै लगातार धम्की दिइरहेका थिए । प्रधानमन्त्री नधम्किएपछि आफै सरकारबाट बाहिरिए । रविले पत्रकार सम्मेनमा पनि फोन आउँछ कि भन्ने आश मानिरहेका थिए । त्यसैले उनले अहिले आउँ भन्दा पनि जान्छ भनिरहेका थिए ।
सरकारबाट फिर्ता हुने धम्की दिएपछि त प्रचण्डले बोलाउँछ भन्ने रविलाई लागेको पत्रकार सम्मेलनका अभिव्यक्ति प्रष्ट देखाएको थियो । धम्की दिँदै दिँदै रवि फिर्ता हुन नसक्ने गरी नैतिकताको डिलमा पुगेका थिए । अनि आफ्नो पद लोलुपको सिकार अन्य तीन मन्त्रीलाई पनि बनाए ।
नेतृत्व गरेको राष्ट्रिय स्वतन्त्र पार्टीका तीन जना मन्त्रीले राजीनामा दिएका छन् । पुनः गृहमन्त्रीसहित उपप्रधानमन्त्री बन्न नपाएको झोकमा सभापति लामिछानेले सरकारबाट फिर्ता हुने निर्णय गरे । त्यसको सिकार केही गर्ने हुटहुटी बोकेका तीन जना मन्त्री भएका छन् ।
विवादको बीच आइतबार दिउँसो पत्रकार सम्मेलनको आयोजना गरेर सरकारबाट फिर्ता हुने निर्णय सार्वजनिक गरेका लामिछानेले सरकारबाट मन्त्रीहरुलाई फिर्ता बोलाए । उनको उर्दी अनुसार साँझ श्रम, रोजगार तथा सामाजिक सुरक्षामन्त्री डोलप्रसाद अर्याल, शिक्षा, विज्ञान तथा प्रविधिमन्त्री शिशिर खनाल र स्वास्थ्य तथा जनसंख्या राज्यमन्त्री तोसिमा कार्कीले प्रधानमन्त्री प्रचण्डलाई राजीनामा बुझाए ।
तीनै जना राजिनामा पत्र बोकेर मलिन अनुहारसहित प्रधानमन्त्री निवास वालुवाटार पुगेका थिए । उनीहरुले आफूहरुले राम्रो काम गरेर प्रधानमन्त्रीलाई सहयोग गर्न चाहेको तर पार्टीले फिर्ता हुने निर्णय गरेका कारण राजिनामा गरेकाे बताएका थिए ।
मन्त्रीहरुलाई नै आइतबार नै राजिनामा दिनुपर्छ भन्ने लागेको थिएन । उनीहरु दिउँसोसम्म मन्त्रालयका काममै ब्यस्त रहेका थिए ।
राहदानी विवाद नटुंगिँदै रविले पुनः उपप्रधानसहित गृहमन्त्री बनाउन प्रधानमन्त्री प्रचण्डलाई चौतर्फी दवाव दिएका थिए । तर प्रचण्डले स्वार्थ जोडिएको बताउँदै अन्य मन्त्रालय लिन भनेका थिए ।
आइतबार विहान प्रधानमन्त्रीसँग भेटेका रविले दिउँसो गृहबाहेक अरु नलिने भन्दै सरकारबाट बाहिरिने निर्णय गरे । उनले पत्रकार सम्मेलनमै अहिले नै फोन आए पुनः गृहमा फर्किने समेत बताएका थिए ।
प्रधानमन्त्री प्रचण्डले फैसलाको पूर्णपाठ आइनसकेको र राहदानी विवाद पनि सँगै आएको कारण गृह नभएर उपप्रधानसहित भौतिक पूर्वाधार तथा यातायात मन्त्रालय प्रस्ताव गरेका थिए ।
धम्की दिए पाइने ठानेर रविले नेकपा एमालेका अध्यक्ष केपी शर्मा ओलीसँग गुहार मागेका थिए । ओलीले पनि रविलाई पुनः गृहमन्त्री बनाउन प्रधानमन्त्रीलाई दवाव दिँदै आएका थिए ।
पत्रकार सम्मेलनमा रवि मिडिया र पत्रकारमाथि नै खनिए । उनले आफ्ना विरुद्ध लेख्ने पत्रकार र मिडियाको नामै किटेर कार्यालय घेराउ गर्ने चेतावनी समेत दिएका थिए ।
गृहमन्त्री गुमाउँदा आली आक्रोस भएको समेत स्वीकार गर्दै दोहोर्याएर भनेका थिए, ‘अहिले बोलाउँदा पनि जान्छु ।’
