अनलाइन डबली
काठमाडौँ । रवि लामिछानेले नेतृत्व गरेको राष्ट्रिय स्वतन्त्र पार्टी (रास्वपा)को शनिबार साँझ बसेको बैठक विना निष्कर्ष सकिएको छ । सरकारमा सहभागिता हुने वा फिर्ता हुने भन्ने विषयमा निर्णय गर्न बसेको बैठकले कुनै निर्णय गर्न सकेन ।
प्रधानमन्त्री प्रचण्डले गृह बाहेक अरु मन्त्रालय रोज्न विकल्प दिएका थिए । त्यसपछि सभापति रवि लामिछानेले सरकारबाट फिर्ता हुने प्रस्तावसहित बैठक बोलाएका थिए । तर बैठकमा नेताहरु दुई पक्षमा बाँडिएका थिए ।
एक नेताका अनुसार सभापति लामिछानेले सरकारबाट फिर्ता हुने प्रस्ताव राखेका थिए । तर, बैठकमा बोल्ने अधिकांश नेताहरुले सरकारबाट फिर्ता हुन नहुने मत राखेका थिए । उनीहरुले गृहमन्त्रालय नदिएपनि अन्य मन्त्रालय लिएर सरकारलाई समर्थन गर्नु पर्ने मत राखेका थिए ।
प्रधानमन्त्री प्रचण्डले अदालतबाट फैसलाको पूर्णपाठ पनि आइनसकेको र राहदानीबारे पनि छानविन भइरहेको हुँदा रविलाई गृहमन्त्रालय दिन नसकिने बताउँदै आएका छन् । तर, नेकपा एमालेका अध्यक्ष केपी शर्मा ओली र स्वयम् रविले गृह मन्त्रालय दिन दवाव दिइरहेका छन् ।
यसबारे निर्णय गर्न भनेर शनिबार साँझको पार्टी कार्यालयमा केन्द्रीय समिति र संसदीय दलको संयुक्त बैठक बसेको थियो । अल्ममतमा परेपछि सभापति लामिछाने बैठक नै स्थगित गरेका थिए ।
पार्टीका मुख्य सचेतक सन्तोष परियारका अनुसार बैठक आज ११ बजे बस्ने छ ।
