अनलाइन डबली
काठमाडौँ । नेकपा (माओवादी केन्द्र) का स्थायी समिति सदस्यहरुले राष्ट्रपति चयनमा राष्ट्रिय सहमति जुटाउन अध्यक्ष प्रचण्डलाई नेताहरुले सुझाव दिएका छन् । शुक्रबार बोल्ने अधिकांश नेताहरुले राष्ट्रिय सहमति जुटायर राष्ट्रपति निर्वाचन गर्नुपर्ने धारणा राखेका छन् ।
उपाध्यक्ष तथा प्रवक्ता कृष्णबहादुर महराले बैठकपछि संचारकर्मीसँग संक्षिप्त कुरा गर्दै बोल्ने अधिकांश सदस्यहरुले राष्ट्रपतिका सवालमा राष्ट्रिय सहमतिमा जोड दिएको जानकारी दिए ।
“राष्ट्रपतिका विषयमा राष्ट्रिय सहमति कायम गर्ने मुलभूत रुपमा धेरै कमरेडहरुको आवाज आएको छ तर यसबारे निर्णय भने भइसकेको छैन” महराले भने । महराले आफ्नो पार्टीको मत राष्ट्रिय सहमतिमै रहेको बताए । यसबारे अरु पार्टीसँग गर्ने गर्ने समेत माओवादीले बताएको छ ।
गठबन्धमा प्रधानमन्त्री र सभामुख आलोपालो गर्ने र राष्ट्रपति एमालेले लिने सहमति भएको भनिएपनि माओवादी केन्द्रले सुरुदेखि नै राष्ट्रिय सहमतिको कुरा उठाइरहेको छ ।
राष्ट्रपतिको चुनाव फागुन २६ देखि २८ भित्र गर्ने गरी निर्वाचन आयोगले तयारी गरेको छ ।
