अनलाइन डबली
काठमाडौं । आज पनि सुदूरपश्चिम प्रदेशको सभामुख निर्वाचन हुँदैछ । यसअघि दुई पटकसम्म भएको निर्वाचनका कसैले पनि बहुमत नपाएपछि आज पुनः निर्वाचन हुन लागेको हो ।
गठबन्धनबाट नेकपा माओवादी केन्द्रका भीम भण्डारी र नेपाली कांग्रेसबाट मानबहादुर रावल सभामुखका उम्मेदवार छन् । पुस २८ गते भएको मतदानमा एक सांसदको मत बदर भएसँगै भण्डारी सभामुख बन्न सकेनन् । उनले २६ मत मात्रै पाए ।
त्यो दिन केन्द्रमा गठबन्धनमै रहेको नागरिक उन्मुक्तिले पनि भण्डारीलाई मतदान गरेको थियो । तर, त्यसपछि उसले मतदानमा सहभागी नहुने नीति लियो । उन्मुक्तीले मतदान नगरेपछि कसैले पनि आवश्यक मत पाउन सकेका छैनन् ।
प्रदेशसभामा ५३ जना रहेका छन् । सभामुखको लागि २७ जनाको समर्थन आवश्यक पर्छ । पुस ३० गते भण्डारी र रावलले २२-२२ मत पाए ।
प्रदेशसभाको पहिलो बैठक भएको १५ दिनभित्र सभामुख चयन गरिसक्नुपर्ने संवैधानिक व्यवस्था छ । संविधानको धारा १८२ को उपधारमा १ मा प्रदेश सभाको पहिलो बैठक प्रारम्भ भएको मितिले १५ दिन भित्र प्रदेश सभाका सदस्यहरूले आफू मध्येबाट प्रदेश सभामुख र प्रदेश उपसभामुखको निर्वाचन गर्ने छन् उल्लेख छ ।
सभामुखको टुंगो नलागेकै कारण उपसभामुखको चुनाव अन्यौलमा छ । सभामुखले तोकेको दिन वा समयमा उपसभामुखको चुनाव हुने व्यवस्था छ ।
आज पनि सभामुख चयन नभएपछि संवैधानिक संकट पैदा हुने भएको छ । संविधानमा १५ दिनभित्र सभामुख चयन नभए के गर्ने भन्ने संविधानमा कुनै व्यवस्था गरिएको छैन । त्यसैले पनि संवैधानिक संकट पैदा हुने भएको हो ।
