अनलाइन डबली
काठमाडौँ । प्रधानमन्त्री प्रचण्डले राष्ट्रपति र सभामुखबारे कसैसँग लिखित सहमति नभएको बताएका छन् । शनिबार विभिन्न सञ्चारमाध्यमहरुका सम्पादकहरुसँगको छलफलमा प्रधानमन्त्रीले सभामुखको निर्वाचन अघि सर्वदलीय बैठक बोलाउन लागेको जानकारी दिएका हुन् ।
‘राष्ट्रपति, उपराष्ट्रपति, सभामुखबारे लिखित सहमति केही छैन । मलाई विश्वासको मत दिने दलहरूको सर्वदलीय बैठक माघ ३ गते बोलाउँछु । सर्वदलीय सहमति बनाउने मेरो कोसिस छ, सर्वदलीय बैठकले धेरै कुरा निर्धारण गर्छ’ प्रधानमन्त्री प्रचण्डले भने । उनले भोलि आइतबार सर्वदलीय बैठक आह्यवान गर्ने समेत जानकारी दिए ।
सत्तारुढ दलहरुबीच सभामुख पद नेकपा एमालेले पाउने सहमति भएको नेताहरुले बताएका थिए तर प्रधानमन्त्री लिखित सहमति नभएको बताए ।
आगामी माघ ५ गते सभामुखको निर्वाचन हुनुअघि नेपाली काँग्रेससहितका दलहरुसँग प्रधानमन्त्रीले बैठक गरेर साझा सहमतिको बिन्दु खोज्ने प्रयास गरेका छन् ।
त्यसैगरी प्रधानमन्त्री प्रचण्डले मन्त्रिपरिषद् विस्तारमा कुनै समस्या नभएको बताए । साझेदार दलको समझदारीमा समस्या नभएको बताउँदै केही दिनमै मन्त्रिमण्डले पूर्णाता पाउने जानकारी समेत दिए ।
देशको अर्थतन्त्र अप्ठ्यारोमा रहेकोमा प्रधानमन्त्री प्रचण्डले चिन्ता व्यक्त गर्दै आफू अर्थतन्त्रलाई सहजीकरण गर्ने विषयमा केन्द्रित भएको पनि बताए । प्रधानमन्त्रीले अर्थमन्त्री र गभर्नरलाई बोलाएर समस्या समाधानका लागि पहल गरेको समेत बताए ।
