अनलाइन डबली
काठमाडौँ । प्रधानमन्त्री प्रचण्डले मन्त्रिपरिषद्लाई पूर्णता दिने तयारी गरेका छन् । मन्त्रिपरिषदले पूर्णता नपाउँदा जनताको दैनिक जीवनसँग जोडिएका कामकारवाहीलाई थप प्रभावकारी बनाउन प्रधानमन्त्रीले चाँडो मन्त्रिपरिषदलाई पूर्णता दिन पहल थालेका हुन् ।
प्रधानमन्त्रीले आजै मन्त्रिपरिषदलाई पूर्णता दिने गरी तयारी थालेको बताइएको छ । त्यसको लागि साझेदार दलहरूको बैठक सिंहदरबारस्थित प्रधानमन्त्री तथा मन्त्रिपरिषद्को कार्यालयमा बोलाइएको छ ।
सरकारमा जान तयारीमा रहेका दल र यसअघि सरकारमा सहभागी नेकपा माओवादी केन्द्र, नेकपा एमाले र रास्वपाले थप पाउने मन्त्रालयबारेमा छलफल गर्न बैठक बोलाइएको हो । प्रधानमन्त्री प्रचण्ड र एमाले अध्यक्ष ओलीबीच दुई चरण यसबारे छलफल भएको थियो । विहीबार मात्रै पनि ओली बालुवाटार पुगेका थिए ।
यसअघि एमालेले उपप्रधानसहित चार मन्त्रीको शपथ गराएको छ भने माओवादीबाट प्रधानमन्त्री र एक उपप्रधानमन्त्री, रास्वपाले उपप्रधानमन्त्री र जनमतले एक मन्त्रीको शपथ गराइसकेको छ । अब १७ वटा मन्त्रालय भागबन्डा गर्न बाँकी छ । सरकारमा सहभागी हुन बाँकी राप्रपा, जसपा, र नागरिक उन्मुक्ति छन् ।
