अनलाइन डबली
काठमाडौँ । आज गठबन्धन दलको बैठक बस्दैछ । बैठकले मन्त्रिमण्डल विस्तार र मन्त्रीको भागबण्डाबारे टुंगो लगाउने नेताहरुले बताएका छन् ।
संसदमा प्रचण्ड विश्वासमो मत पाएपछि प्रधानमन्त्रीले मन्त्रिमण्डल विस्तारको तयारी थालेका छन् । बुधबार दिउँसो गोरखा पुगेका प्रधानमन्त्री प्रचण्ड साँझ बालकोट पुगेर नेकपा एमालेका अध्यक्ष केपी शर्मा ओलीसँग छलफल गरेका थिए ।
पुस १० गते प्रधानमन्त्री प्रचण्डले आफूसँगै थप तीन उपप्रधान र एमालेका तीन जना मन्त्रीको शपथ गराएका थिए । आफूले विश्वासको मत पाएपछि मात्रै मन्त्रिमण्डल विस्तार गर्ने बताउँदै आएका प्रचण्डले छलफल सुरु गरेका छन् ।
सरकारमा सहभागी भएका र इच्छा जाहेर गरेर समर्थन गरेका दलका शिर्ष नेताहरुसँग पनि प्रधानमन्त्री प्रचण्डले छलफल सुरु गरेका छन् ।
त्यसैगरी एमाले, माओवादी, राष्ट्रिय स्वतन्त्र पार्टीबाट मन्त्री कसलाई बनाउने भन्नेबारे पनि नेताहरुले आन्तरिक छलफल सुरु गरेका छन् ।
आजको बैठकमा मन्त्रिमण्डल विस्तारसँगै सरकारको न्यूनतम साँझा कार्यक्रम कार्यान्वयनबारे पनि छलफल हुनेछ ।
