अनलाइन डबली
काठमाडौँ । जनता समाजवादी पार्टी नेपाल (जसपा) ले प्रधानमन्त्री प्रचण्डलाई विश्वासको मत दिने निर्णय गरेको छ । जसपाको राजनीतिक समितिको बैठकले आफ्ना मागहरु पूरा गर्न प्रचण्ड सकारात्मक भएको भन्दै सरकार विश्वासको मत दिने निर्णय गरेको हो ।
सरकारको न्यूनतम साझा कार्यक्रममा आफूहरुले उठाउँदै आएका मागहरु पनि समेटिएका भन्दै जसपाले खुशी समेत व्यक्त गरेको छ । प्रधानमन्त्री नियुक्तिको बेला प्रधानमन्त्रीलाई समर्थन गरेको जसपा सरकारमा सहभागी हुन पनि सकारात्मक छ ।
जसपाको राजनीतिक समितिको बैठकबाट सरकारमा सहभागी हुनका लागि राखिएका सर्तहरुमध्ये नागरिकता समस्या समाधान र सुशासनको प्रत्याभूति जस्ता विषय पनि न्युनतम साझा कार्यक्रमको मस्यौदामा समेटिएको जसपाले बताएको छ ।
यद्यपि पुस २७ गतेलाई पृथ्वी जयन्तीका रुपमा सार्वजनिक विदा दिने विषयलाई मस्यौदामा समेट्ने कुरामा भने जसपाको असहमति प्रकट गरेको छ । सरकार सञ्चालनका निम्ति सत्ता साझेदार दलहरूको न्यूनतम साझा कार्यक्रम निर्धारण गर्न गठित कार्यदलले सरकारमा सहभागी दलका शीर्ष नेताहरूलाई आफ्नो प्रतिवेदन बुझाएको छ ।
