अनलाइन डबली
काठमाडौँ । बागमती प्रदेशको मुख्यमन्त्रीको लागि यही पुस २५ गतेभित्र दाबी पेश गर्न आह्वान गरिएको छ । प्रदेश प्रमुख यादवचन्द्र शर्माले विहीबार नयाँ सरकार गठनका लागि आह्वान गरेका हुन् ।
प्रदेश प्रमुख शर्माले कुनैपनि दलले बहुमत नल्याएका कारण दुई वा दुई भन्दा बढी दलहरुसँगको सहकार्यमा सरकार गठनका लागि आह्वान गरेका हुन् । प्रदेश प्रमुख कार्यालयका सचिव ओमबहादुर खड्काका अनुसार संविधानको धारा १६८ को उपधारा (२) बमोजिम पुस २५ गते ५ बजेभित्र दाबी पेश गर्न आह्वान गरिएका छ ।
निर्वाचनको अन्तिम परिणाम सार्वजनिक भएको मितिले ३५ दिन भित्र सरकार गठन गरिसक्नु पर्ने संवैधानिक प्रावधान छ । प्रदेश प्रमुख कार्यालय हेटौंडाले निर्वाचनको अन्तिम परिणाम सार्वजनिक भएको मिति गत मंसिर २८ गतेलाई आधार मानेर सरकार गठनको लागि आह्वान गरेको सचिव खड्काले बताए ।
सरकार गठनको आह्वान भएको दिनदेखि ५ दिन भित्र मुख्यमन्त्रीमा बहुमत सदस्यको हस्ताक्षरसहित दावी पेस गर्न भनिएको छ ।
प्रदेशको कुल ११० सदस्यीय बागमती प्रदेशसभामा सरकार गठनका लागि ५६ जनाको सांसदको समर्थन आवश्यक हुन्छ ।
बागमती प्रदेशसभामा सबैभन्दा ठूलो दल नेपाली कांग्रेसको ३७ जना सांसद रहेका छन् भने एमालेका २७, माओवादी केन्द्रका २१, राप्रपाका १३, नेकपा एकीकृत समाजवादीका ७, नेमकिपाका ३ र हाम्रो नेपाली पार्टीका २ जना सांसद रहेका छन् ।
