काठमाडौँ । प्रतिनिधिसभा ज्येष्ठ सदस्य पशुपति शमशेर जबराले पुस २२ गते सर्वदलीय बैठक बोलाएका छन् । पुस २५ गते प्रतिनिधिसभाको पहिलो बैठक बस्ने भएकोले संसद सचिवालयले सर्बदलीय बैठक बोलाएको हो । राष्ट्रपति विद्यादेवी भण्डारीले २५ पुसमा प्रतिनिधिसभाको अधिवेशन आह्वान गरेकी छन् ।

संसद सचिवालयका अनुसार पहिलो बैठकमा दलहरूले बोल्न पाउने समय बाँडफाँडका विषयमा छलफल हुनेछ । गत मंसिर ४ गते सम्पन्न चुनावमा सातवटा दल मात्र राष्ट्रिय पार्टी बनेका छन् भने संसदमा १२ वटा दलको प्रतिनिधित्व हुने भएको छ । त्यस्तै, पाँचजना स्वतन्त्र सांसद प्रतिनिधिसभामा छन् ।

चुनावमा नेपाली काँग्रेस ८९ सांसदसहित पहिलो दल, नेकपा एमालेका ७८ सांसदसहित दोस्रो दल, नेकपा माओवादी केन्द्र ३२ सांसदसहित तेस्रो दल बनेका छन् । त्यस्तै, राष्ट्रिय स्वतन्त्र पार्टीका २०, राप्रपाको १४, जसपाको १२, एकीकृत समाजवादीका १०, जनमत पार्टीका ६, लोसपाका चार, नागरिक उन्मुक्ति पार्टीका तीन सांसद छन् ।