अनलाइन डबली
काठमाडौँ । नेकपा (एकीकृत समाजवादी) र जनता समाजवादी पार्टीले सरकारमा सहभागिताको विषयमा निर्णय लिन बैठक बस्दैछन् । एकीकृत समाजवादीको पोलिटब्युरो बैठक आज बस्दैछ ।
दुई दिनसम्म बसेको स्थायी कमिटी बैठकले सरकारमा सहभागिताको विषयमा निर्णय लिन नसकेपछि पोलिटब्यूरो बैठक बोलाइएको हो । स्थायी समितिमा सरकारमा सहभागि हुने वा प्रतिपक्षमा बस्ने भन्नेमा नेताहरुबीच फरक फरक धारणा रहेको एक नेताले बताए ।
पार्टी अध्यक्ष माधव कुमार नेपाल सरकारमा जाने विषयमा सकारात्मक रहेको तर अन्य नेताहरु सरकारलाई समर्थन गरेर बाहिरै बस्नुपर्ने मत बैठकमा राखेका थिए । त्यस्तै, सम्मानित नेता झलनाथ खनालले सम्मानजनक अवस्थामा भए सरकारमा सहभागी हुनुपर्ने मत राखेका थिए ।
पोलिटब्यूरो पनि एकमतका साथ निर्णय लिन नसके केन्द्रीय समिति बैठकले निर्णय लिने नेताहरुले बताएका छन् ।
त्यसैगरी सरकारमा सहभागिताकै विषयमा निर्णय लिन जनता समाजवादी पार्टीको बैठक बसेका छ । ललितपुरको भोलढोकास्थित ज्यापू प्रज्ञा भवनमा बिहान ११ बजे सुरु भएको बैठक भोलिसम्म चल्छ । यही बैठकले सरकारको न्यूनतम साझा कार्यक्रम र सरकारमा सहभागिताबारे निर्णय गर्ने बताइएको छ ।
जसपाले माओवादी केन्द्रका अध्यक्ष प्रचण्डनेतृत्वको सरकारलाई समर्थन गरे पनि सरकारमा जाने वा नजाने विषयमा कुनै निर्णय गरिसकेको छैन ।
कार्यकारिणी समितिको बैठकले यो विषय टुंगो लगाउने जिम्मा राजनीतिक समितिलाई दिएको थियो । बैठकमा चुनावको समीक्षा, विधान अधिवेशन र दलहरूसँग एकतालगायतका विषयमा पनि छलफल हुने बताइएको छ ।
