अनलाइन डबली
काठमाडौं । नेकपा माओवादी केन्द्रका अध्यक्ष प्रचण्ड पाँच दलीय गठबन्धन टुटेको बताएका छन् । बालुवाटार बैठकबाट बाहिरिएर पार्टीका नेताहरुसँगको छलफलमा प्रचण्डले नेपाली काँग्रेसका कारण गठबन्धन टुटेको जानकारी गराए ।
काँग्रेसले प्रधानमन्त्री र राष्ट्रपति दुबै नछोड्ने अडान नछोडेसँगै आज बसेको गठबन्धनको बैठक विना निष्कर्ष टुंगिएको छ । बालुवाटारबाट बाहिरिएका प्रचण्डले पार्टी नेताहरुसँग ब्रिफिङ गरेका थिए ।
नेताहरुका अनुसार प्रधानमन्त्री शेरबहादुर देउवाले पूर्वसहमति पालना नगरेका कारण सहमति हुन नसकेको हो ।
यसैबीच काँग्रेस नेता रामचन्द्र पौडेलले पनि गठबन्धन टुटेको बताएका छन् । गठबन्धनको औचित्य सकिएको भन्दै प्रचण्ड बैठकबाट बाहिरिएको पौडेलले जानकारी दिए । उता सरकारका प्रवक्ता समेत रहेका ज्ञानेन्द्र बहादुर कार्कीले भने गठबन्धन टुटिनसकेको बताउँदै फेरि बैठक बस्ने संचारकर्मीलाई जानकारी दिए ।
