अनलाइन डबली
काठमाडौं । नेपाली कांग्रेसले गठबन्धनमा चुनावअघि भएको सहमति तोडेपछि नेकपा एमाले र नेकपा माओवादी केन्द्रबीच छलफल सुरु भएको छ । बालुवाटारमा भएको निर्णायक वार्तामा काँग्रेसले पुरानै अडान दोहोर्याएपछि सहमति भाँडिएको हो ।
काँग्रेस नेताहरुले प्रधानमन्त्री र राष्ट्रपति दुबै नछोड्ने अडान लिएपछि माओवादी केन्द्र र नेकपा एकीकृत समाजवादीका नेताहरु बालुवाटारबाट बाहिरिएका छन् । सुरुमा प्रचण्ड बालुवाटारबाट निस्किएका थिए भने त्यसपछि एकीकृत समाजवादीका अध्यक्ष र नेता झलनाथ खनाल पनि बाहिरिएका थिए ।
यसैबीच नयाँ सरकार गठनको लागि माओवादी र एमाले नेताहरुबीच संवाद सुरु भएको छ । प्रचण्ड र ओलीबीच केही छिनमा भेट गराउने तयारीमा दोस्रो तहका नेताहरु लागेका छन् ।
केही दिनदेखि एमाले र माओवादीका दोस्रो तहका नेताहरुबीच अनाैपचारिक वार्ता भइरहेको थियो ।
बहुमतसहित सरकारको नेतृत्वमा दाबी गर्न राष्ट्रपति विद्यादेवी भण्डारीले दिएको सात दिनको समयसीमा आज साँझ ५ बजे सकिने भएकाले त्यसअघि नै शक्ति बाँडफाँटमा सहमति खोज्न नेताहरु प्रयासरत छन् ।
