अनलाइन डबली
काठमाडौं । नयाँ सरकार गठनको लागि प्रधानमन्त्री शेरबहादुर देउवा र नेकमा माओवादी केन्द्रका अध्यक्ष प्रचण्डबीच निर्णायक वार्ता भइरहेको छ । देउवा र प्रचण्डबीच वान टू वान वार्ता भएको बताइएको छ ।
अध्यक्ष प्रचण्ड एक्लै बालुवाटार पुगेका थिए । त्यसअघि आइतबार विहान पदाधिकारी बैठक बोलाएर प्रचण्डले अब चाल्ने कदमबारे छलफल गरेका थिए । पदाधिकारी बैठकले पनि शक्ति बाँडफाँडमा नझुक्न सुझाव दिएको थियो । एक नेताका अनुसार बरु सरकार बाहिर बस्ने तर राष्ट्रपति र प्रधानमन्त्री दुवै कांग्रेसलाई छोड्न नसक्ने निष्कर्ष निकालेको थियो ।
त्यसअघि कांग्रेसका नेता विमलेन्द्र निधि देउवाको सन्देश लिएर खुमलटार पुगेका थिए । प्रचण्डलाई भेट्न खुमलटार पुगेका निधिले राष्ट्रपति र प्रधानमन्त्री दुवै नछोड्ने अडान सुनाएका थिए ।
प्रधानमन्त्री देउवाले पनि विहान आफू निकट नेताहरुसँग बालुवाटारमा छलफल गरेका थिए ।
अहिले पनि प्रचण्ड र देउवाको छलफल चलिरहेको छ ।
यसैबीच नेकपा एकीकृत समाजवादीका अध्यक्ष माधव कुमार नेपाल पनि बालुवाटार पुगेका छन् । देउवा र प्रचण्डबीच वान टू वान वार्ता चलिरहेकै बेला नेपाल पनि पुगेका छन् ।
