अनलाइन डबली
काठमाडौँ । नेपाली काँग्रेसले चुनावअघि गरेको सहमति तोडेपछि पाँच दलीय गठबन्धन गम्भीर संकटमा परेको छ । चुनाव अघि प्रधानमन्त्री तथा पार्टी सभापति शेरबहादुर देउवाले आलोपालो प्रधानमन्त्री अन्तरगत पहिलो नेतृत्व गर्ने दलले राष्ट्रपति छोड्नु पर्ने सहमति गरेका थिए ।
तर चुनाव सकिएर नयाँ सरकार गठनबारे छलफलमा देउवाले पहिलो चरणमा आफूले नै नेतृत्व गर्ने र राष्ट्रपति पनि आफ्नै पार्टीको हुनुपर्ने अडानमा छन् । सुरुका दिनमा पहिलो चरणमा गठबन्धनको दोस्रो ठूलो दल नेकपा माओवादी केन्द्रका अध्यक्ष प्रचण्डलाई छोड्न सकारात्मक रहेको बताएका देउवा शक्ति बाँडफाँडको लागि तयार भएनन् ।
राष्ट्रपति विद्यादेवी भण्डारीले नयाँ सरकार गठनको लागि प्रधानमन्त्रीको लागि दाबी पेश गर्न दिएको समय आजै पाँच बजे सकिँदैछ । तर यो समाचार तयार पार्दासम्म गठबन्धनमा सहमति हुने संकेत देखा परेको छैन । नेताहरु अन्तिम छलफलमा जुट्ने तयारीमा छन् ।
एक नेताका अनुसार शनिबार बालुवाटारमा भएको बैठकमा पनि देउवाले आफूलाई पार्टीभित्रबाट प्रधानमन्त्री र राष्ट्रपति नछोड्न दवाव रहेको बताएका थिए । उनले जनमतको कदर गर्न समेत गठबन्धनका अन्य नेताहरुलाई आग्रह गरे । माओवादी र एकीकृत समाजवादीका नेताहरुले देउवा प्रधानमन्त्री हुँदाको जनमत र चुनाव अघिको सहमति सम्झाएका थिए । तर, त्यसबारे कुनै प्रतिक्रिया नदिएर आफ्नो अडानबाट पछि हटेनन् ।
देउवालाई प्रधानमन्त्री बनाउन भन्दै काँग्रेस सांसदहरुले हस्ताक्षर समेत संकलन गरिरहेका छन् । शुक्रबारबाट सुरु भएको हस्ताक्षर अभियान आज विहानसम्म चलिरहेको छ । शनिबार काँग्रेसकै सबै सांसदहरुले खाली कागजमा हस्तक्षार गर्न मानेन् ।
अपराह्न ४ बजेको गठबन्धन बैठकमा माओवादी र एकीकृत समाजवादीका नेताहरुले देउवालाई प्रधानमन्त्री वा राष्ट्रपति एक छोड्न भनेका थिए । तर, देउवाले नमानेपछि बैठक विना निष्कर्ष टुंगिएको थियो । देउवाले राष्ट्रपतिसँग थप समय माग्नबारे आफूले कुरा गरिरहेको बताएका थिए ।
यसैबीच देउवाले लिएको अडानबाट काँग्रेसभित्र नेता रामचन्द्र पौडैल र शशांक कोइराला असन्तुष्ट छन् । पौडेलले देउवा र प्रचण्डलाई भेटेर आफ्ना कुरा राखेका छन् ।
स्राेतका अनुसार पौडेलले पहिलो कार्यकाल प्रचण्डलाई छोड्न देउवालाई सुझाव दिएका छन् । उनले गठबन्धन भत्किए राजनीतिक अस्थिरतातिर जाने र संकट पैदा हुने बताउँदै राष्ट्रपति काँग्रेसले लिएर प्रचण्डलाई प्रधानमन्त्री छोड्नुपर्ने लविङ गरिरहेका छन् । कोइराला पनि पौडेलको कुरामा सहमत छन् । काँग्रेसभित्रको गठबन्धन विरोधी भनेर चिनिएका गगन थापा लगायतका नेताहरुले भने देउवालाई दुबै पद नछोड्न भनिरहेका छन्
