अनलाइन डबली
काठमाडौँ । नेकपा (माओवादी केन्द्र) का प्रचण्डले राष्ट्रपतिले आह्वान गरेकै समयसीमा भित्र देशले नयाँ प्रधानमन्त्री पाउने बताएका छन् ।
सोमबार चितवन संचारकर्मीहरुसँग कुरा गर्दै प्रचण्डले राष्ट्रपतिले सरकार गठनका लागि सात दिनको समय दिएकाले सोही समयावधिभित्र गठबन्धनबाट प्रधानमन्त्री चयन हुने भन्दै कसको नेतृत्वमा सरकार गठन गर्ने भन्नेबारे गठबन्धनमा छलफल चलिराखेको समेत बताए ।
प्रचण्डले गठबन्धनमा छलफल गरेर प्रधानमन्त्री को बन्नेबारे टुंगो लगाउने बताउँदै आफूले प्रधानमन्त्रीको दाबी गर्नु स्वाभाविक भएपनि प्रचारमा आएजस्तो औपचारिक रुपमा प्रस्ताव नगरेको दाबी गरे ।
संचारकर्मीको प्रश्नको जवाफ दिँदै प्रचण्डले माओवादीले नेकपा एमालेसँग सरकार बनाउने भन्ने चर्चा सत्य नभएको पनि बताए । उनले छलफल सबैसँग चलेपनि एमालेसँग त्यो स्तरको छलफल समेत नभएको बताए ।
त्यसैगरी अध्यक्ष प्रचण्डले आफूले प्रधानमन्त्रीका लागि सवै चिज दाउमा नराख्ने बताए ।
