अनलाइन डबली
काठमाडौं । मंसिर ४ सम्पन्न चुनावमा प्रत्यक्षतर्फ १० सिट जितेर पनि थ्रेस होल्ड कटाउन नसकेको नेकपा (एकीकृत समाजवादी) संसदीय दलको कार्यालय पाउने तर सचेतकको सुविधा नपाउने भएको छ । राजनीतिक दल सम्बन्धी एेनमा समानुपातिकतर्फ ३ प्रतिशत मत ल्याउने दल मात्रै राष्ट्रिय पार्टी बन्ने र सचेतकको सुविधान नपाउने व्यवस्था गरिएको छ ।
थ्रेस होल्ड कटाएका ७ राजनीतिक पार्टीले मात्रै सचेतकसहितको सुविधा पाउने भएका छन् । तर एकीकृत समाजवादी सहित दश वटा दलले संसदीय दलको सुविधा पाउने भएका छन् । नेकपा एमालेबाट विभाजन भएपछि एकीकृत समाजवादीले दलको कार्यालय पाइसकेको थियो ।
नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा), लोकतान्त्रिक समाजवादी पार्टी (लोसपा)को यसअघि रहेकै स्थानमा संसदीय दलको कार्यालय रहनेछ । त्यस्तै रवि लामिछानेको पार्टी, राप्रपा, नागरिक उन्मुक्ति र सिके राउतको जनमत पार्टीलाई नयाँ कार्यालयको व्यवस्था गर्न लागिकएको संसद सचिवालयले जनाएको छ ।
त्यसैगरी एक सिट जित्ने जनमाेर्चा र मजदूर किसान पार्टी र स्वतन्त्र सांसदहरुले पनि कार्यालय पाउने भएका छन् । उनीहरुले एक कोठाको कार्यालय र एकजना कर्मचारी पाउने संसद सचिवालयले जनाएको छ ।
