अनलाइन डबली
काठमाडौं। निर्वाचन आयोगले प्रतिनिधि सभा सदस्य तथा प्रदेश सभा सदस्य निर्वाचन अन्तरगत समानुपातिकबाट निर्वाचित हुने सदस्यहरुको अन्तिम सूची सार्वजनिक गर्ने अन्तिम तयारी गरेको छ । सोमबारै सूची सार्वजनिक गर्ने भनिएपनि समय अपुगका कारण देखाउँदै आयोगले अन्तिममा गरेन ।
समानुपातिकतर्फका प्रवक्ता गुरूप्रसाद वाग्लेका अनुसार आयोगले निर्वाचित भएको घोषणासँगै सांसदहरूलाई प्रमाणपत्र वितरण गर्ने तयारी समेत गरेको छ ।
दलहरुले प्राप्त गरेको मतका आधारमा आयोगले नेकपा एमालेले ३४, नेपाली कांग्रेसले ३२, नेकपा माओवादी केन्द्र १४, स्वतन्त्र पार्टीले १३, राप्रपाले ७ तथा जसपा र जनमतले ५–५ सिट प्रदान गरिसकेको थियो । त्यही संख्याका आधारमा दलहरुले बन्दसूचीबाट अन्तिम नामावली आयोगमा पेश गरेका थिए ।
समानुपातिकको अन्तिम नतिजा सार्वजनिक भएसँगै आयोगले राष्ट्रपति विद्यादेवी भण्डारीसमक्ष अन्तिम परिणाम बुझाउनेछ। त्यसपछि नयाँ सरकार गठनको प्रक्रिया सुरु हुनेछ।
