अनलाइन डबली
काठमाडौँ । नेपाल कम्युनिष्ट पार्टी (बहुमत) का संयोजक धर्मेन्द्र बास्तोला ‘कञ्चन’ले अहिलेको चुनावमा नेपाली जनताले कम्युनिष्टलाई कारबाही गरेको बताएका छन् ।
शुक्रबार काठमाडौँको संवाद डबलीमा योजना गरिएको “नेपाली कम्युनिष्ट आन्दोलनको आगामी दिशा” बिषयक अन्तरक्रिया कार्यक्रममा बोल्दै उनले यस्तो बताएका हुन् ।
नेपालका कम्युनिष्ट भन्नेहरु चाहे त्यो एमाले होस् या माओवादी केन्द्र, यिनीहरुले आफ्नो सिद्दान्त र नीति छोडेका कारण चुनावमा जनताले मतदान नगरेर उनीहरुलाई कारबाही गरेको कञ्चनले दाबी छ ।
अहिलेको नेपालको कम्युनिष्ट आन्दोलन पथ भ्रष्ट भएको भन्दै अहिले नेपालमा कम्युनिष्ट भन्ने पार्टीहरुले सामान्ती प्रकारको ब्यबहार गर्ने, आफ्नो सर्बहारा बर्गीय धर्मबाट च्युत हुने र दलाल, भ्रष्टहरुलाई पोस्ने कार्य गरेका कारण जनताले सबक सिकाएको बताएका छन् ।
यदि संसदवाद नेपालमा रहिरह्यो भने कम्युनिष्टको नाममा भोट थाप्नेहरु सबै नेपालबाट नामेट भएर जाने समेत उनले बताएका छन् । त्यसकारण नेपाल र नेपालीको हित चाहाने हो भने नेपालका सम्पूर्ण कम्युनिष्टहरुको एकता र ध्रुविकरणको जरुरी भएको उनको भनाइ छ ।
नेपालका कम्युनिष्ट भन्ने पार्टीहरु प्राय साम्राज्यवादी र बिस्तारवादीहरुको चाटुकार बन्ने गरेका कारण जनतामा कम्युनिष्टप्रति बितृष्णा जागेको भन्दै कञ्चनले नेपालमा मात्र नभएर विश्वभर नै क्रान्तिकारीहरुका लागि परिस्थिति अनुकुल बन्दै गइरहेकाले सबै कम्युनिष्टहरुलाई एक्रिकृत र ध्रुविकृत बन्न आग्रह गरेका छन् ।
यस्तै कार्यक्रममा बोल्दै नेकपा क्रान्तिकारी माओवादीका प्रबक्ता हरिभक्त कंडेलले नेपालमा बिजय उन्मुख भैसकेको क्रान्तिलाई नेतृत्वको आत्मसुरक्षा र आत्मसमर्पणका कारण बिसर्जन गरिएको र नेपाली जनतामाथि ठुलो धोका भएको भन्दै आम नागरिकको मुक्तिका लागि आफुहरु अझै पनि लागि परेको बताएका छन् ।
कार्यक्रममा नेकपा मशालका प्रबक्ता राम बहादुर बुढाले नेपालमा अधुरो रहेको क्रान्तिलाई पुरा गर्नका लागि सम्पूर्ण बामपन्थी र क्रान्तिकारीहरुको एकताको आवश्यकता रहेको बताएका छन् ।
अन्तरक्रिया कार्यक्रममा रक्तिम सांस्कृतिक अभियानका संयोजक नारायण शर्माले स्वागत मन्तब्य राखेका थिए । यस्तै अखिल नेपाल जनसांस्कृतिक महासंघका संयोजक खेम थपलियाले सञ्चालन गरेको कार्यक्रमका अध्यक्षता प्राध्यापक जगदीश चन्द्र भण्डारी रहेका थिए।
