अनलाइन डबली
काठमाडौं । दोलखाको मत गणना जारी छ । सोमबार विहानसम्म अर्थात अहिले भरखर प्राप्त मत परिणाम अनुसार नेकपा (माओवादी केन्द्र) नेता गंगा कार्कीले अग्रता कायमै राखेका छन् । कार्कीले ३३ हजार ६ मत पाएका छन् । कार्कीले आइतबार दिउँसोबाट पुनः अग्रता लिएका थिए ।
त्यसैगरी कार्कीलाई पछाइरहेका नेकपा (एमाले) का बालकृष्ण शिवाकोटीले ३२ हजार ८२३ मत पाएका छन् । उनी कार्कीभन्दा १८३ मतले पछाडि परेका छन् । शिवाकोटीले रातिभन्दा मतान्तर भने घटाएका छन् । आइतबार राति १८ सय मतान्तरले पछाडि परेका शिवाकोटीले सोमबार विहानसम्म मतान्तर घटाएर १८३ पुर्याएका छन् ।
मत गणनाको सुरुदेखि कार्कीले अग्रता लिएका थिए । तर शनिबार रातिदेखि एमाले उम्मेदवार शिवाकोटीले अग्रता लिएका थिए ।
मत गणना अन्तिम चरणमा पुगेको छ । अब विगु गाउँपालिका १ को लामावगर, २ को ओराङ र ३ बुलुङ र शैलुङ गाउँपालिका १ को दुधपोखरी र २ को भुषाफेदा तथा मेलुङ गाउँपालिका १ को पवटी र ३ माथिल्लो घ्याङको मत गन्न बाँकी छ ।
यसअघि दोलखाको प्रदेश १ मा कांग्रेसका कुन्दनराज काफ्ले र प्रदेशसभा २ मा एमालेका भरतबहादुर केसी निर्वाचित भइसकेका छन् । जिल्लामा जम्मा ९४ मतदानस्थल र एक सय ९५ मतदान केन्द्र रहेका थिए । एक लाख ६१ हजार चार सय ५० मतदाता रहेकोमा ८५ हजार तीन सय ८८ खसेको थियो ।
