काठमाडौं । दोलखाको जारी मत गणनाको पछिल्लो परिणाम सार्वजनिक भएको छ । नेकपा माओवादी केन्द्रका उम्मेदवार गंगा कार्कीले फेरि अग्रता लिएका छन् । दुई हजार बढी अग्रता लिएका नेकपा एमालेका उम्मेदवार बालकृष्ण शिवाकोटीलाई फेरि पछी पारेका छन् ।
यो समाचार तयार पार्दासम्म कार्कीले २१ हजार ४१२ मत पाएका छन् । एमालेका शिवाकोटीले २१ हजार १४१ मत ल्याएर पछाइरहेका छन् । शिवाकोटी २७१ मतले पछि परेका छन् । सुरुवाती अग्रता लिएका कार्कीलाई शनिबार राति शिवाकाेटीले पछि पारेका थिए ।
आइतबार विहानसम्म शिवाकोटीले दुई हजार बढी मतले कार्कीलाई पछि पारेका थिए । शिवाकाेटीले निरन्तर अग्रता लिने एमालेका नेताहरुका अपेक्षा पूरा हुन सकेन । विहानबाट भीमेश्वरपछि वैतेश्वर गाउँपालिकाको मत गणना सुरु गरेपछि कार्कीले मतान्तर घटाउँदै लगे । बैतेश्वरको वडा नम्बर १, २, ३, ६ र ८ को गणना सकिँदा कार्कीले फेरि शिवाकोटीले अग्रता लिएका छन् ।
गौरीशंकर गाउँपालिकाको मत गणना हुँदा कार्कीले शिवाकोटीसँगको मतान्तर १ हजार ४३८ सम्म पुर्याएका थिए । तर कालिञ्चोक गाउँपालिका र जिरी नगरपालिकाको मत गन्दा शिवाकोटीले मतान्तर घटाउँदै ल्याए । कालिञ्चोक गणना सकिँदा शिवाकोटीको कुल मत ६ हजार ७०० र कार्कीको ७ हजार ९९५ थियो । कार्की शिवाकोटी भन्दा १ हजार २९५ मतले अगाडि थिए ।
त्यसपछि जिरीका वडा नं ६, ७, ८ र ९ को समेत मतगणना सकिँदा कार्की र शिवाकोटीको मतान्तर १ हजार १६७ मा झर्यो । भीमेश्वर नगरपालिकाको गणनाका क्रममा भने शिवाकोटीले मतान्तर घटाउने मात्र होइन अग्रतासमेत लिए । भीमेश्वरको मत गनेर सकिँदा शिवाकोटीले कार्कीले भन्दा २०१५ बढी मत पाए ।
अब बैतेश्वरका ३ वटा वडा, तामाकोसी, मेलुङ, बिगु र शैलुङ गाउँपालिकाको मत गन्न बाँकी छ । स्थानीय तह निर्वाचनमा बिगु र शैलुङ माओवादी केन्द्र, मेलुङ एमाले र तामाकोशी नेकपा एकीकृत समाजवादीले जितेका छन् ।
प्रदेश सभामै खसेको अनुपातमा मत आए आफूहरूले चुनाव जित्ने भन्दै कार्की आशावादी छन् । प्रदेश सभा सदस्यका कांग्रेस उम्मेदवार कुन्दनराज काफ्ले तामाकोसी गाउँपालिकाबाट राम्रो मत पाएका छन् । सोही अनुसार कार्कीलाई पनि मत खसेको गठबन्धनका नेताहरुले आशा गरेका छन् ।
अब बिगुको मत नै निर्णयक हुने भएको छ । बिगुमा एमालेले हजार मत आउने अपेक्षा गरेकाे छ भने गठबन्धनका नेताहरुले पनि राम्रो भोट आउने बताउँछन् ।