अनलाइन डबली
काठमाडौं । प्रतिनिधि सभाकाे समानुपातिक मत गणना अन्तिम चरणमा पुगेको छ । निर्वाचन आयोगका अनुसार मंगलबार विहानसम्म ९४ लाख ९६ हजार ७१४ मत गणना भइसकेको छ । जसमा सबैभन्दा धेरै मत ल्याएर नेकपा एमाले पहिलो स्थानमा छ भने नेपाली काँग्रेस दोस्रो स्थानमा रहेको छ ।
आयोगका अनुसार एमालेले २५ लाख ७० हजार ८२३ मत ल्याएको छ भने नेपाली काँग्रेसले २४ लाख ३८ हजार ६४४ मत ल्याएको छ । सोमबार चौंथोमा झरेको नेकपा माओवादी केन्द्रले ११ लाख नजिक मत पुर्याएको छ । माओवादी केन्द्रले १० लाख ९४ हजार मत ल्याएको छ ।
त्यसैगरी राष्ट्रिय स्वतन्त्र पार्टीले १० लाख ७० हजार मत ल्याएको छ । पाँचौंमा रहेको राष्ट्रिय प्रजातन्त्र पार्टीले ५ हजार ४९ हजार १९८ मत ल्याएको छ । त्यस्तै, जनता समाजवादी पार्टी, नेपालले ३ लाख ४५ हजार १७ मत ल्याएको छ । सिके राउतको जनमत पार्टीले २ लाख ८८ हजार २१६ मत ल्याएको छ ।
वाम लोकतान्त्रिक गठबन्धनकाे साझेदार दल नेपाल कम्युनिष्ट पार्टी (एकीकृत समाजवादी) ले अहिलेसम्म २ लाख ६२ हजार ८८४ मत ल्याएको छ । नागरिक उन्मुक्ति पार्टीले २ लाख ४५ हजार १८५ मत ल्याएको छ । त्यस्तै लोकतान्त्रिक समाजवादी पार्टी नेपालले १ लाख ३१ हजार ४६३ मात्रै मत ल्याएको लोसपा पनि राष्ट्रिय पार्टी नबन्ने पक्का भएको छ ।
अब तीन जिल्लाको परिणाम आउन बाँकी छ । उदयपुर, दोलखा र बाजुराको मत परिणाम आउन बाँकी छ । दोलखाका १० स्थानमा पुनः मतदान हुने भएको छ भने उदयपुरमा स्थगित मत गणना पुनः सुरु गरिएको छ ।
