धनगढी । अछाम क्षेत्र नं.२ प्रदेशसभा क मा वाम लोकतान्त्रिक गठबन्धनका उम्मेदवार अक्कल बहादुर रावलले मतान्तर बढाउँदै लगेका छन् । बुधबार साँझबाट मत गणना सुरु हुँदा नै अग्रता लिएका रावलले राति १२ः४६ बजे मतान्तर बढाएका छन् ।
निर्वाचन अधिकृतकाे कार्यालय अछामले सार्वजनिक गरेको मत परिणाम अनुसार कुल खसेको २० हजार ७२२ मतमध्ये राति १२ः४६ सम्म ८ हजार ६९४ मत गणना भएको छ । जसमा रावलले ४ हजार २७४ मतसहित अग्रता लिएका छन् ।
मतगणना स्थलमा रहेका पत्रकार रमेश रावतका अनुसार नेकपा एमालेका उम्मेदवार भीमबहादुर विष्टले ४ हजार ३५ मतसहित पछ्याइरहेका छन् । रावलले २३९ मतले अग्रता लिएका छन् भने ३८५ मत बदर भएका छन् ।
त्यस्तै क्षेत्र नं. १ को प्रदेशसभा क मा गठबन्धनका उम्मेदवार मेघ राज खडका विजयी भएका छन् । नेपाली काँग्रेसका नेता खड्काले १२ हजार ३३७ पाएका छन् । नेकपा एमालेका देवबहादुर कुँवरले ६ हजार ४९७ मात्रै पाए ।
त्यसैगरी प्रदेशसभा ख मा पनि गठबन्धनका उम्मेदवार नेकपा माओवादी केन्द्रका नेता झपट साउदले अग्रता कायमै राखेका छन् । साउदले नेकपा एमालेका कृष्णप्रसाद जैसीलाई दुई हजार बढी मतले पछि पारेका छन् । साउदले ८ हजार १३ मत पाउँदा जैसीले ५ हजार ६३० मत पाएका छन् ।
यसैबीच पर्सा-३ मा एमालेका राजकुमार गुप्ता विजयी भएका छन् । गुप्ताले कांग्रेसका सुरेन्द्र चौधरीलाई १ सय ५१ मतले पराजित गरेका हुन् । गुप्ताले २४ हजार २ सय ६० मत ल्याएका छन् । चौधरीले २४ हजार १ सय ९ मत ल्याएका छन् ।
