अनलाइन डबली
काठमाडौं । रोल्पाबाट प्रतिनिधिसभा सदस्यमा नेकपा माओवादी केन्द्रका उपमहासचिव वर्षमान पुन ‘अनन्त’ विजयी भएका छन्। पुनले ४१ हजार ७१४ मत ल्याएर विजयी भएका छन् । नेकपा एमालेका पूर्ण बुढामगरलाई २५ हजार२२९ मतको अन्तरमा पराजित गर्दै पुन विजयी भएका हुन् ।
बुढामगरले १६ हजार ४८५ ल्याएका थिए । त्यस्तै राष्ट्रिय प्रजातन्त्र पार्टीका लीला रावलले २ हजार ५५६ मत ल्याएका छन् भने राष्ट्रिय प्रजातन्त्र पार्टी नेपालका राम बहादुर वली क्षेत्रीले ८०३ मत पाएका छन् । त्यस्तै नेपाल मजदुर किसान पार्टीका नाती भाइ ह्योम्बाले १५२ मत मात्रै पाए ।
यसैबीच प्रतिनिधिसभा अन्तर्गत पर्सा क्षेत्र नम्बर ३ मा नेकपा एमालेका राजकुमार गुप्ता निर्वाचित भएका छन् । उनले नेपाली कांग्रेसका सुरेन्द्रप्रसाद चौधरीलाई झिनो मतान्तरले पराजित गरेका हुन् ।
गुप्ताले २४ हजार २६० मत प्राप्त गर्दा चौधरीले २४ हजार १०९ मत प्राप्त गरे । २०७४ को निर्वाचनमा यो क्षेत्रबाट तत्कालीन संघीय समाजवादी फोरमका हरिनारायण रौनियार निर्वाचित भएका थिए ।
त्यस्तै झापा – २ बाट प्रतिनिधिसभा सदस्यमा एमालेका देवराज घिमिरे निर्वाचित भएका छन् । घिमिरेले स्वतन्त्र उम्मेदवार भद्रप्रसाद नेपाल (स्वागत नेपाल) लाई २ हजार २ सय ५६ मतान्तरले पराजित गर्दै विजयी हात पारेका हुन्।
घिमिरेले २८ हजार ६ सय ९७ मत पाउँदा नेपालले २६ हजार ४ सय ४१ मत पाए । सत्ता गठबन्धनका साझा उम्मेदवार। माओवादी केन्द्रका हरि रानाले १३ हजार ९ सय २४ मत मात्र प्राप्त गरे ।
