अनलाइन डबली
गोरखा । गोरखा नगरपालिका–८ रानिवनमा भेटिएको बम नेपाली सेनाले डिस्पोज गरेको छ ।
निर्वाचन शुरु भएसँगै द ओल्ड क्यापिटल माध्यमिक विद्यालयमा रहेको मतदानस्थलनजिकै कुकरमा टेप लगाएर तार जोडेको अवस्थामा बम भेटिएको थियो ।
उक्त बम निस्क्रिय बनाएर अहिले मतदान भइरहेको जिल्ला प्रहरी कार्यालय गोरखाका डिएसपी लिलाराज लामिछानेले बताए । सो मतदान केन्द्रमा अहिले मतदान भइरहेको छ ।
उता दार्चुलाको शैल्यशिखर नगरपालिका ५ मालिकार्जुन मावि ग्वानी बगौरा मतदान केन्द्रमा हवाई फायर भएको छ । एक जना मतदाताले मतदान गर्ने क्रममा विवाद भएपछि विवाद भएको थियो ।
विवाद सान्य पार्न प्रहरीले तीन राउण्ड हवाई फायर गरेको हो । हवाई फायर हुँदा आधा घण्टा मतदान रोकिएको थियो ।
सरोकारवाला निकायसँगको छलफलपछि मतदान पुनः सुचारु भएको जिल्ला प्रहरी कार्यालय दार्चुलाका प्रमुख प्रहरी नायव उपरीक्षक तर्कराज पाण्डेयले जानकारी दिए ।
मत हाल्न पुगेका एक जना मतदाताको मत पहिल्यै अरुले हालेको पाएपछि विवाद भएको थियो । विवाद उत्पन्न भएपछि प्रहरीले सम्झाउने प्रयास गर्दा भीड आक्रोशित बन्दै प्रहरीमाथि ढुंगा मुढा प्रहार गरेपछि प्रहरीले स्थिति नियन्त्रणमा लिनको लागि हवाई फायर गरेको हो ।
सरोकारवाला निकायबीचको छलफलपछि अहिले अवस्थामा सामान्य बनेको डिएसपी पाण्डेयले बताए ।
