![](https://onlinedabali.com/wp-content/uploads/2022/11/bisfot.jpg)
काठमाडौँ । धनगढीको मतदानस्थलमा बम विस्फोट भएको छ। धनगढी- २ काे शारदा माध्यमिक विद्यालय मतदानस्थल नजिक बम विस्फोट भएको छ।
कैलाली जिल्ला प्रहरीको अनुसार केहीबेर अघि विस्फोटकाे आवाज सुनिएको थियाे। सेनाको टाेली घटनास्थल पुगेर अनुसन्धान हुँदैछ। बिस्फोटको आवाज सुनेर मतदाताहरु घरतिर भागेका छन् ।
उता रौतहटमा मतदानस्थलबाहिर हो-हल्ला गर्नेहरूलाई तितरबितर पार्न प्रहरीले दुई राउन्ड हवाई फायर गरेको छ।
रौतहटका प्रमुख जिल्ला अधिकारी कृष्णबहादुर शाहीका अनुसार गुजरा नगरपालिकाको कनकपुर मावि मतदान केन्द्रमा एक राउण्ड र गरूडा नगरपालिकाको प्रावि भवन अमरपट्टि एक राउन्ड हवाई फायर भएको जानकारी दिए।
‘मतदानस्थलबाहिर हो-हल्ला गर्नेहरूलाई तितरबितर पार्न हवाई फायर गरिएको हो। अहिले शान्तिपूर्ण रूपमा मतदान भइरहेको छ,’ शाहीले भने।
विभिन्न दलका समर्थकले बाहिर हो-हल्ला गरेका थिए। प्रहरीले हवाई फायर गरेपछि उनीहरू त्यहाँबाट हटेका छन्। यता विप्लव नेतृत्वको नेकपा माओवादीले चितवनमा निर्वाचन बिथोल्ने प्रयास गरेको छ।
चितवन क्षेत्र नम्बर-१ राप्ती-८ स्थित ब्रम्हस्थानी आधारभूत विद्यालयको मतदान केन्द्रमा उक्त पार्टीका कार्यकर्ताले निर्वाचन बिथोल्ने प्रयास गरेका हुन्।
१५-२० जनाको समूहमा रहेको समूहले निर्वाचन बिथोल्न खोजेपछि एक राउण्ड हवाई फायर गरिएको चितवन प्रहरीका प्रवक्ता डिएसपी विजयराज पंडितले बताए।
हवाई फायरपछि उनीहरू भागेको र खोजी कार्य भइरहेको डिएसपी पण्डितले बताए। अहिले भने मतदान पुन: सुरू भएको छ।