![](https://onlinedabali.com/wp-content/uploads/2022/11/bahiskar.jpg)
काठमाडौँ । नेपाल कम्युनिष्ट पार्टीनिकट अखिल नेपाल जनसांस्कृतिक महासंघले आगामी मङ्सिर ४ गतेको निर्वाचन सत्तासीनहरूले आफ्नो लुटको स्वर्ग जोगाउन गर्दै आएको झुटको अर्को नयाँ शृङ्खला बाहेक अरु केहि नभएको प्रष्ट पारेको छ ।
महासंघका संयोजक खेम थपलियाले बिहिबार एक बिज्ञप्ति जारी गर्दै संसदीय दलहरूको सबैखाले उत्पीडनकारी तथा औपनिवेशीकृत मनसुवा पूरा गर्ने माध्यमको रूपमा हुन लागिरहेको मङ्सिर ४ को निर्वाचनको सशक्त अवज्ञाको आह्वान् गरेका छन् ।
इतिहासको यस घडीमा दलाल तथा फासिवादी शासकहरूको यस्तो लम्पसारवादी र देशद्रोही मनसुवालाई पूरै अवज्ञा गर्न र देश तथा जनताका विरुद्ध बुनिएका कथित झुटका पुलिन्दाको भण्डाफोर गर्नुको कुनै विकल्प नभएको बताएका छन् ।
‘सत्तासीनहरू आफ्नो लुटको स्वर्ग जोगाउन असङ्ख्य झुटका पुलिन्दा बुनिरहेछन् । मङ्सिर ४ को निर्वाचन त्यही झुटको अर्को नयाँ शृङ्खला मात्र हो ।’ विज्ञप्तिमा भनिएको छ- ‘इतिहासको यस घडीमा हामी दलाल तथा फासिवादी शासकहरूको यस्तो लम्पसारवादी र देशद्रोही मनसुवालाई पूरै अवज्ञा गर्दछौँ । देश र जनताका विरुद्ध बुनिएका कथित झुटका पुलिन्दाको भण्डाफोर गर्नुको कुनै विकल्प छैन ।’
इतिहासमा ठुल–ठुला बलिदानको मूल्य जनताले नै चुक्ता गर्दै आएको स्मरण गर्दै उनले तर पनि सत्तामा जनताका तिनै दुश्मन र जनघातीहरू नै हाबी हुँदै आएको प्रष्ट पारेका छन् ।
साम्राज्यवादी, घरेलु प्रतिक्रियावादी तथा दक्षिणपन्थी हावाहुन्डरी मडारिइरहेको यतिबेला अनेक प्रकारका परिघटना देखापरिरहेको र जनयुद्धबाट प्राप्त उपलब्धि ध्वस्त पारिएको समेत विज्ञप्तिमा उल्लेख छ । साम्राज्यवादीहरूको टेकोपोडोमा प्रतिक्रियावादी शासकहरू सबै किसिमका वर्गसङ्घर्ष, तिनमा जनताबाट अभिव्यक्त त्याग, समर्पण र बलिदानी मूल्यका विरुद्ध भयानक षड्यन्त्र गरिरहेको उनले बताएका छन् ।
नेपालमा लामो समयदेखि जनताको रगत–पसिना पिउँदै र हड्डी चपाउँदै आएका जनबैरीहरू नयाँ–नयाँ आबरणमा नयाँ–नयाँ फन्डा गरिरहेको भन्दै उनले यो फन्डाको उपक्रम मङ्सिर ४ को संसदीय निर्वाचनसम्म आइपुगेको र जसलाई पूर्णतः अवज्ञा गर्नु अनिवार्य बन्न गएको प्रष्ट पारेका छन् ।
‘मङ्सिर ४ को निर्वाचनलाई अवज्ञा गर्नु भनेको जनताको महान् सङ्घर्ष र महान् सहिदको सम्मान गर्नु पनि हो । सहिदहरूका रगतले लेखेको इतिहास, उनका जीवनोत्सर्ग, बलिदानको सपना र वैचारिक निष्ठाले प्रतिरोध, बलिदान र वर्गसङ्घर्षको संस्कृतिको निरन्तरताको आवश्यकतालाई नै इङ्गित गरिरहेको छ । हामीलाई फेरि एकपटक शौर्य, साहस र वीरताको यौद्धिकगायन चाहिएको छ । फेरि एकपटक कुची, कलम र मादलसित वर्गीय विचार, आस्था र सघन वर्गसङ्घर्षको अन्तर्घुलन आवश्यक परेको छ ।’ विज्ञप्तिमा भनिएक छ ।
साथै मरणासन्न राष्ट्रघाती तथा जनघाती दलाल संसदीय पुँजीवादी व्यवस्था र यसको प्राणप्रतिष्ठा गर्ने मङ्सिर ४ को निर्वाचनका विरुद्धको अवज्ञा सङ्घर्षमा सहभागी हुन उनले सबै वैकल्पिक व्यवस्थाका पक्षधर विशेष आह्वान गरेका छन् । वैज्ञानिक समाजवादी क्रान्तिको महान् यात्रामा वर्गचेतना, वर्गप्रेम, साम्यवादी सपना र शौर्यका साथ सम्पूर्ण क्रान्तिकारी कवि, कलाकार, लेखक, साहित्यकार एवम् संस्कृतिकर्मीहरूलाई लामबद्ध हुन अखिल नेपाल जनसांस्कृतिक महासङ्घले विशेष अपील गरेको छ ।
‘मरणासन्न राष्ट्रघाती तथा जनघाती दलाल संसदीय पुँजीवादी व्यवस्था र यसको प्राणप्रतिष्ठा गर्ने मङ्सिर ४ को निर्वाचनका विरुद्धको अवज्ञा सङ्घर्षमा सहभागी हुन हामी वैकल्पिक व्यवस्थाका पक्षधर सबैलाई विशेष आह्वान गर्दछौँ ।’ विज्ञप्तिमा भनिएक छ- ‘वैज्ञानिक समाजवादी क्रान्तिको महान् यात्रामा वर्गचेतना, वर्गप्रेम, साम्यवादी सपना र शौर्यका साथ सम्पूर्ण क्रान्तिकारी कवि, कलाकार, लेखक, साहित्यकार एवम् संस्कृतिकर्मीहरूलाई लामबद्ध हुन हाम्रो सङ्गठन अखिल नेपाल जनसांस्कृतिक महासङ्घ विशेष अपील गर्दछ ।’