अनलाइन डबली
काठमाडौँ । नेपालमा फेरी भूकम्पको धक्का महसुस भएको छ । अछाम केन्द्रबिन्दू भएर भुकम्प गएको हो ।
मंगलबार साँझ ६ बजेर ८ मिनेट जाँदा अछाम जिल्लाको बाबाला केन्द्रबिन्दु भएर ४.२ रेक्टर स्केलको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ ।
केन्द्रका अनुसार उक्त भूकम्प गोरखा भूकम्पको परकम्प नभएर नयाँ भूकम्प हो । पछिल्लो समय देशको सुदूरपश्चिम र मध्यपश्चिम क्षेत्र केन्द्रबिन्दु भएर भूकम्प जाने क्रम बढेको छ । भूकम्पले हल्लाएपछि मान्छेहरुको भागभाग भएको थियो ।
यसअघिकाे भूकम्पका कारण बझाङका विभिन्न स्थानीय तहमा रहेका घरहरु भत्किएका छन् । डोटी भूकम्पपछि पनि शनिबार राति खप्तड छान्ना गाउँपालिकास्थित पाटादेवल केन्द्रबिन्दु भएर ५.३ म्याग्निच्युडको भूकम्प गएको थियो ।
भूकम्पले दुर्गाथली गाउँपालिका ३ स्थित रकैलका जयलाल पार्कीको २ तले घर, वडा नम्बर ५ का हंशराज जप्रेलको २ तले घर, बित्थडचिर गाउँपालिका ७ का चक्र अधिकारीको २ तले घर र बित्थडचिर गाउँपालिका ७ का रमादेवी ढाँटको ४ कोठे घर भत्किएको भएको जिल्ला प्रहरी कार्यालयले जनाएको छ ।
त्यस्तै भूकम्पले बित्थडचिर गाउँपालिका ४ का जस्बीर बोहरा, गगन बोहरा र ७ का बिरे बोहराका घरहरु चर्किएका छन् ।
निरन्तर भुकम्पको धक्का जान थालेपछि जिल्लाबासीमा त्रास छाएको छ भने प्रहरीले माइकिङ गरी स्थानीयहरुलाई सचेत रहन आग्रह गर्दै आएको छ ।
