अनलाइन डबली
काठमाडौँ । दार्चुलाको नौगाड गाउँपालिका–६ धुलीगाडामा सत्ता गठबन्धन र नेकपा एमालेका कार्यकर्ताबीच झडप भएको छ।
आइतबार भएको झडपमा परेर सत्ता गठबन्धनका एक कार्यकर्ता गम्भीर घाइते भएका छन्। नेकपा माओवादी केन्द्रका जयभानसिंह धामी घाइते भएका हुन्।
जिल्ला प्रहरी कार्यालयका सूचना अधिकारी राजेश शाहीका अनुसार ३५ वर्षीय धामीको प्राथमिक स्वास्थ्य केन्द गोकुलेश्वरमा उपचार गराई थप उपचारका लागि धनगढी लगिएको छ। घाइते धामी माओवादी केन्द्र काठमाडौँ–दार्चुला सम्पर्क समन्वय समितिका अध्यक्ष हुन्।
यसअघि गत साता सत्ता गठबन्धन र एमाले कार्यकर्ताबीच अपिहिमाल गाउँँपालिकामा झडप भएको थियो। घटनापछि उक्त क्षेत्रमा थप सुरक्षाकर्मी परिचालन गरिएको शाहीले बताए।
सो क्षेत्रमा नेपाल प्रहरीका साथै सशस्त्र प्रहरीसमेत परिचालन गरिएको छ। यता निर्वाचन आयोगले सबै राजनीतिक दल एवं सबै उम्मेदवारलाई निर्वाध रूपमा प्रचारप्रसार गर्ने वातावरण सृजना गर्न गृह मन्त्रालयलाई निर्देशन दिएको छ।
आइतबार दिउँसो चितवनको मुग्लिनमा राष्ट्रिय स्वतन्त्र पार्टीका सभापतिसहित प्रचारप्रसारमा रहेको बेलामा एउटा गाडीमा तोडफोड भएको थियो।
तोडफोड भएपछि आयोगका उपसचिव एवं सहायक प्रवक्ता कमल भट्टराईले विज्ञप्ति जारी गर्दै सबै राजनीतिक दल एवं उम्मेदवारलाई निर्वाध रूपमा प्रचारप्रसार गर्ने वातावरण सृजना गर्न गृह मन्त्रालयलाई पुन: निर्देशन दिएको हो।
‘पछिल्लो समयमा चितवनलगायत विभिन्न जिल्लामा उम्मेदवारले निर्वाध रूपले प्रचारप्रसार गर्ने कार्यमा अवरोध तथा निर्वाचनमा सहभागी पक्षहरूबीच विवाद भई सवारी साधन तोडफोड भएको भन्ने सम्बन्धमा आयोगको गम्भीर ध्यानाकर्षण भएको छ,’ आयोगले भनेको छ।
आयोगले यसअघि नै दल, उम्मेदवार, कर्मचारी, अनुगमनकर्ता, पर्यवेक्षक, मतदातालाई आवश्यक सुरक्षाको प्रत्याभूतिसहित स्वच्छ, स्वतन्त्र, निष्पक्ष र भयरहित वातावरणमा निर्वाचनमा सहभागी हुने वातावरण तयार गर्न सबै जिल्ला प्रशासन कार्यालयलाई कात्तिक २२ गते नै निर्देशन दिएको थियो।
आज फेरि तोडफोड भएपछि आयोगले मन्त्रालयलाई पुन: निर्देशन दिएको हो। फाइल तस्विर: गुगलबाट
