अनलाइन डबली
काठमाडौं । डोटीमा भूकम्पले ६ जनाको मृत्यु भएकै दिन काठमाडौँमा २ घटना घटेका छन् । काठमाडौंको बसुन्धरा सडकखण्डमा सवारी दुर्घटना हुँदा दुई जनाको मृत्यु भएको छ ।
बुधबार नारायणगोपाल चोकबाट ५० मिटर पश्चिमतर्फ बसुन्धारा सडकखण्डमा ट्रक र स्कुटर ठक्कर खाँदा स्कुटरमा सवार दुईजनाको मृत्यु भएको प्रहरीले जनाएको छ ।
मृत्यु हुनेमा कालिका-९ का ४७ वर्षीय बेलबहादुर राना मगर र मादी गाउँपालिका-५ वर्षीय कल्पना राना मगर रहेका छन् ।
प्रहरीले ना. ८ ख.१८४१ को ट्रक चालकलाई नियन्त्रणमा लिएको छ भने मृतकका आफन्तहरुलाई सम्पर्क गर्ने प्रयास भइरहेको जनाएको छ ।
त्यस्तै चर्चित पत्रकार सरोजराज अधिकारी झुन्डिएको अवस्थामा मृत भेटिएका छन् । सुन्धारास्थित सिद्धार्थ होटलमा उनी झु न्डिएको अवस्थामा मृत भेटिएका हुन् ।
अधिकारी कात्तिक २१ गते साँझदेखि सिद्धार्थ होटलमा बसेका थिए । उनकी श्रीमतीले अधिकारी हराएकाे भनेर प्रहरीसमक्ष निवेदन दिएकी थिइन् । शवलाई पोस्टमार्टमका लागि त्रिवि शिक्षण अस्पतालमा लगिएको छ ।
घटनास्थलमा सुसाइड नोट नभेटिएको काठमाडौं प्रहरी प्रवक्ता एसपी दिनेशराज मैनालीले नेपाल प्रेसलाई जानकारी दिएका छन् । घटनाको विस्तृत विवरणबारे अनुसन्धान भइरहेको मैनालीले बताए ।
अधिकारीले चक्रब्यूहमा चन्द्रसूर्य, धम्बोझी, रुपबजारकी नोरा, जासुसीको जालो पुस्तक लेखेका थिए ।
