अनलाइन डबली
धनगढी । नेपाली काँग्रेसका सभापति तथा प्रधानमन्त्री शेरबहादुर देउवाविरुद्ध स्वतन्त्र उम्मेदवारी दिएका कर्ण मल्ललाई नेकपा एमालेले समर्थन गर्ने भएको छ । डडेल्धुरामा सांगठानिक अवस्था कमजोर भएपनि देउवालाई हराउने भन्दै एमालेका अध्यक्ष केपी शर्मा ओलीले मल्ललाई नै समर्थन हुने गर्ने बताएका छन् ।
शुक्रबार कंचानपुरमा आयोजित चुनावी सभालाई सम्बोधन गर्दै ओलीले मल्ललाई दिएको समर्थन कायमै रहेको जानकार गराए । ‘हामी हाम्रो प्रतिबद्धतामा कायम छौं, मैले सुने त्यहाँ कसैले बक्तव्य निकाल्यो भनेर तर त्यस्तो अधिकार अरुलाई छैन’ ओलीले भने । मल्ललाई समर्थन गर्न नसकिने डडेलधुरा एमालेले मल्ललाई समर्थन नगर्ने भन्दै विज्ञप्ति निकालेको थियो ।
एमाले डडेलधुराका अध्यक्ष प्रेमबहादुर बोहोरा तथा सचिव शिवराम ताम्राकारले स्वतन्त्र उम्मेदवारी दिएका पूर्व एमाले नेता विक्रमबहादुर शाहीलाई समर्थन गर्ने निर्णय गरेको विज्ञप्ति निकालेका थिए । तर अध्यक्ष केपी शर्मा ओलीले त्यो विज्ञप्ति निकाल्ने अधिकारी अरुलाई नभएको बताए ।
डडेल्धुरामा प्रतिनिधिसभा सदस्यमा उम्मेदवारी नदिएको एमाले दुई चिरामा बाँडिएको छ । अध्यक्ष ओलीले सुरुदेखि नै कर्णलाई समर्थन गर्ने बताउँदै आएका छन्। तर जिल्ला पार्टीले पूर्व एमाले नेता शाहीलाई समर्थन गर्ने जनाएको छ । ओलीले समर्थन गरेका मल्ल नेपाली काँग्रेसबाट विद्रोह गरेर नेपाली कांग्रेस वीपीबाट उम्मेदवारी दिएका छन् ।
