अनलाइन डबली
काठमाडौँ । नेपाली कांग्रेसका सभापति तथा प्रधानमन्त्री शेरबहादुर देउवाले तत्कालीन प्रधानमन्त्री एवं नेकपा एमालेका अध्यक्ष केपी शर्मा ओलीले राष्ट्रपति विद्यादेवी भण्डारीलाई राष्ट्रहित विपरीत कार्य गर्न लगाएको आरोप लगाएका छन् ।
बिहीबार गृहजिल्ला डडेलधुरा पुगेका देउवाले आयोजित चुनावी सभालाई सम्बोधन गर्दै राति २ बजेको समयमा राष्ट्रपति विद्यादेवी भण्डारीलाई संसद् भंग गर्न लगाएको आरोप लगाएका हुन् ।
‘ओलीजीले राति २ बजे राष्ट्रपतिलाई उठाएर ससद भंग गर्नुभयो । त्यसपछि मात्रै म प्रधानमन्त्री भएको हुँ । यसपटक मेरो प्रधानमन्त्री बन्ने मन त थिएन तर ओलीजीको गलत कदमका कारण भएको हुँ’, उनले अगाडि थपे, ‘उत्तम संविधान बनाए पनि ओलीले च्यात्न खोजे । राजनीतिमा स्थायी शत्रु र मित्र हुँदैन ।’
ओलीकै कार्यविरुद्धमा हालको ५ दलीय गठबन्धन बनेको देउवाको भनाइ थियो । उनले हालको ५ दलीय गठबन्धन राष्ट्र हितको लागि भएको बताउँदै आफ्नो १०÷१५ वर्षसम्म पनि चलाउने इच्छा रहेको बताए ।
प्रधानमन्त्री देउवाले भारत र चीनविरुद्ध लड्न नसकिने बताउँदै ती देशहरूसँग नेपालले हातेमालो गरेर अगाडि बढ्नुपर्ने वाध्यता रहेको पनि सुनाए ।
यसैबीच प्रधानमन्त्री देउवाले पश्चिमसेती जल विद्युत् परियोजनाको काम अगाडि बढेको बताएका छन् ।
साथै उनले धनगढी–डडेलधुरा सडकलाई ४ लेनको रूपमा विस्तार गरिने र डडेलधुरा मेडिकल कलेज निर्माणलाई अगाडि बढाइने पनि प्रतिबद्धता जाहेर गरे ।
