काठमाडौं । प्रधानमन्त्री शेरबहादुर देउवाले जनता समाजवादी पार्टी (जसपा) बाट सरकारमा सहभागी चार जना मन्त्रीको राजीनामा मागेको दुई दिन बितिसकेको छ । जसपाले गठबन्धन छोडेर नेकपा एमालेसँग चुनावी तालमेल गरेसँगै प्रधानमन्त्रीले राजिनामा दिन भनेका थिए । तर जसपाका मन्त्रीले अझै राजिनामा गरेका छैनन् ।
प्रधानमन्त्री देउवाले सत्ता गठबन्धन दलका शिर्ष नेताहरुसँग समेत छलफल गरेका थिए । शिर्ष नेताहरुले पनि राजिनामा माग्न नदिए बर्खास्त गर्न देउवालाई सहमति दिइसकेका छन् । एक मन्त्रीका अनुसार देउवाले अन्तिम पटकको लागि प्रधानमन्त्रीले जसपाका मन्त्रीलाई राजिनामा दिन भनेका छन् । तर जसपाका मन्त्रीहरुले आफ्नो दलले गठबन्धन नछोडेकोले राजिनामा नदिने जवाफ पठाएका छन् ।
जसपाबाट संघीय मामिला तथा सामान्य प्रशासन मन्त्री राजेन्द्र श्रेष्ठ, भौतिक पूर्वाधार तथा यातायात मन्त्री मोहम्मद इस्तियाक राई, कृषि तथा पशुपन्छी विकासमन्त्री मृगेन्द्रकुमार सिंह र वन तथा वातावरणमन्त्री प्रदीप यादव सरकारमा सहभागी छन् ।
सत्ता गठबन्धनसँगको चुनावी तालमेलमा सिट बाँडफाँटबारे असहमति जनाएर जसपाले एमालेसँग सहकार्य गरेपछि उनीहरुको पद धरापमा परेको देखिन्छ । मन्त्री तथा जसपाका नेता श्रेष्ठले भने एमालेसँग गठबन्धन गरेको नभई केही सिटमा चुनावी तालमेल मात्रै गरेकाले सरकारबाट हट्न जरुरी नभएको बताए
निर्वाचन आचार संहिता लागु भएका कारण सरकारले नयाँ मन्त्री नियुक्त भने गर्न पाउने छैन । यस्तो अवस्थामा मन्त्रीलाई बर्खास्त गर्ने कि जिम्मेवारी खोस्ने भन्नेमा प्रधानमन्त्रीले छलफल समेत गरेका छन् । गठबन्धन दलका शिर्ष नेताहरुसँग विना विभागीय बनाउनेबारे छलफल नभएर बर्खास्त गर्ने विषयमा छलफल भएको बताइएको छ ।